COVALIMA, 11 novembru 2021 (TATOLI)—Vise–Prezidente Konsellu Veteranu Munisípiu Covalima, Osório Soares “Mausoko”, apela ba joven sira labele envolve iha grupu ilegál sira tenke tuir programa Governu nian.
“Joven sira lábele envolve iha grupu ilegal sira maibe tenke tuir programa Governu. Hamutuk ho Governu, ita sei bele. Alin sira, ukun rasik an dala ida de’it,” Osório Soares “Mausoko” apela ba juventude Covalima iha âmbito atu selebra masakre 12 Novembru iha salaun Uma Feto, Santa Rosa, Covalima, kinta ne’e.
Tanba, nia dehan, Timor-Leste (TL) nia ukun rasik an la’ós hosi bandeija mak entrega maibé hodi ema 200.000 nia raan no ruin mak sosa no ohin loron timor-oan sira bele goja iha rai ne’e.
Juventude Covalima tenke iha unidade no labele haree ba partidu, sei la haree entaun bainhira vota tenke haree ema hodi bele goja hosi ukun rasik an ne’e.
“Realidade hatudu, iha ha’u-nia suku Laktos, postu administrativu Fohorem rasik, agora seidauk asesu ba eletrisidade. Sorte ha’u hela iha Suai Vila, se lae la asesu eletrisidade,” Mausoko informa.
Hafoin Timor-Leste ukun rasik an, nia dehan, timor-an barak mak hetan ka simu subsídiu hosi Governu, entaun ema hotu lakohi ona halo to’os tanba ne’e nesesidade bázika importa hosi nasaun viziñu Indonézia.
Jornalista : Celestina Teles
Editór : Cancio Ximenes
