DILI, 12 novembru 2021 (TATOLI)— Aman hosi Saudozu Sebastião Gomes, Afonso Gomes (74), hateten, maski oferese nia oan mane mesak ba mate hodi liberta rai hosi okupasaun ilegál Indonézia, maibé to’o agora la hetan apoia ruma hosi Governu.
“Ha’u seidauk simu apoia ruma hosi Governu, loos duni momentu José Ramos Horta sei Prezidente Repúblika bolu ha’u no haruka karreta ba tula hosi Viqueque mai Dili, maibé ami to’o iha nia fatin Ramos Horta sai ba reuniaun, ne’ebé to’o agora seidauk iha apoia ruma mai ami família,” Aman hosi Saudosu Sebastião Gomes, hatetem ho mata-been, bainhira partisipa komemorasaun 12 novembru iha Santa Kruz, Balide, sesta ne’e.
Aktivista klandestina saudozu Sebastião Gomes nu’udar oan mane mesak hosi Afonso Gomes ho Rita Rangel, ne’ebé oho hosi militár Indonézia bainhira atake ba Igreja Motael iha loron 28 outubru 1991.
“Ha’u sente triste ho ha’u-nia oan nia mate tanba nia hanesan osan-mean, kuandu nia lakon ha’u triste no tanis,” Aman saudozu ne’e afirma ho mata-been.
Afonso Gomes ho ninia espoza Rita Rangel, dadaun ne’e hela iha aldeia Uma-Liurai, Suku Waimori, munisípiu Viqueque nuudar agrikultór.
“Ha’u lakohi husu barak, maibé atu dehan katak ha’u-nia oan ne’e mate ema hotu ohin loron moris di’ak,” nia akresenta.
Aman hosi saudozu Sebastião Gomes hateten, ohin ne’e loron loriku asuwa’in ne’ebé fó an ba mate hodi halo mundu hakfodak no fó solidaridade ba luta libertasaun independensia.
“Foufoun ne’e akontese iha loron 28 outubru to’o mai 12 novembru. Ha’u haree akontesimentu ne’e ha’u-nia laran kanek tanba ita interese de’it ida no ba 28 outubru ne’e ema la interese ona,” nia lamenta.
Iha biban hanesan, Prezidente Komité 12 Novembru, Gregorio Saldanha, hateten, daudaun komité 12 Novembru liliu lolega sira ne’ebé uluk hamutuk ho saudozu Sebastião halibur malu ona atu tulun saudozu nia inan-aman iha Viqueque.
“Komité 12 Novembru fó atensaun ba Saudozu Sebastião Gomes nia pai no mãe kleur ona ho apoia la’ós atu halo kedas uma ba saudozu nia inan-aman, maibé haree mak nia saúde,” nia akresenta.
Nune’e, Prezidente Komité 12 Novembru husu Governu atu ajuda saudozu nia inan-aman ne’ebé kondisaun saúde la di’ak. Tanba ne’e, komité 12 Novembru sei organiza malu dala-ida atu ajuda família ne’e.
“Ami esforsu nafatin tanba ne’e luta seidauk hotu, tanba sente injustisa tanba balun no balun seidauk hetan, espesialmente ba saudozu Sebastião Gomes nia inan-aman, nune’e ami kontinua hakilar hela de’it ba governu atu ajuda,” nia akresenta.
Notísia Relevante: Gregorio Saldanha husu Governu apoiu saudozu Sebastião Gomes nia inan-aman
Jornalista : Antónia Gusmão
Editór : Florencio Miranda Ximenes
