DILI, 12 novembru 2021 (TATOLI)- Prezidente Repúblika (PR), Francisco Guterres Lú Olo, fó omenajen espesiál ba saudozu Max Stahl no éroi loríku asuwa’in iha ámbitu komemorasaun masakre Santa Kruz 12 novembru 1991 ba dala-XXX no selebrasaun loron nasionál bad ala-16.
“Ho gratidaun kle’an tebes mak fó omajen espesiál ba ita nia maun-alin murak jornalista Max Stahl no éroi loriku asuwa’in, sobrevivente no família mártir 12 novembru, ne’ebé ran fakar iha masakre Santa Krúz iha tinan 30 liu-ba,” Xefe Estadu Lú-Olo, hateten, iha ámbitu komemorasaun loron masakre 12 novembru, iha Santa Krúz,Balide, sesta ne’e.
Tanba, filmajen masakre Santa Krúz ne’ebe kapta hosi saudozu Max Stahl to’o iha rai-li’ur mak loke opiniaun públika internasionál kona-bá situasaun iha Timor-Leste (TL).
PR Lú-olo afirma, masakre 12 novembru 1991 fanu movimentu solidariedade internasionál liuhosi envolvimentu hosi diplomata no ativista Timor-Leste iha diáspora atu luta ba ukun rasik an.
Nune’e, PR Lú-olo lori Estadu Timor-Leste nia naran hato’o hakuak bo’ot ba família erói Max Stahl no família juventude loríku asuwain ne’ebé prezente iha fatin ne’e no família erói libertasaun nasionál ne’ebé mate no lakon durante tinan 24 nia laran.
“Ita mai halibur hamutuk iha fatin ida ne’e atu valoriza liu-tán erói no mártir sira-nia memória ho brani halo manifestasaun 12 novembru 1991 hodi afirma ita nia mehi koletivu ukun rasik an perante komunidade internasionál,” PR Lú Olo afirma.
Komemorasaun masakre 12 novembru iha Dili ho misa funebre no omenajen ba saudozu Max Stahl ne’ebé hala’o iha Brisbane-Austrália.
Jornalista Chirstopher Wenner ho koñesidu Max Stahl ne’ebé filma masakre Santa Cruz 12 Novembru 1991 hakotu iis iha Ospitál Princess Alenxandra , Brisbane, Austrália tanba kauza hosi moras kankru.
Notísia Relevante: Prezidente Repúblika hato’o sentidu lutu ba éroi Max Stahl
Jornalista : Nelson de Sousa
Editór : Florencio Miranda Ximene
