DILI, 12 novembru 2021 (TATOLI)- Prezidente Repúblika, Francisco Guterres Lú-Olo, kontinua husu joven timoroan atu servisu hamutuk ho Governu hodi luta kontra COVID-19.
Iha komemorasaun loron masakre 12 novembru ba dá-la XXX 1991-2021 no komemorasaun loron Nasionál Juventude dala 16, tema sentrál mak “Ho espíritu asuwa’in 12 Novembru nian, juventude sai autór importante ba proteje Timor-Leste hosi Covid-19”.
Xefe Estadu konsidera tema ba komemorasaun ne’e di’ak tebes tanba fanu joven-sira atu preokupa ho saúde.
“Ho laran ksolok tebes mak ha’u simu informasaun husi Sekretáriu Estadu Juventude no Desportu katak sentru juventude iha munisípiu sira, organiza-an ona atu haforsa Governu ninia kampaña sensibiliza komunidade kona-bá importánsia simu vasina hasoru COVID-19,” Xefe Estadu kongratula.
Joven sira hakarak apoia Governu iha kampaña vasinasaun mai hosi fiar ida katak ho vasina mak bele proteje an di’ak liu hasoru virus ne’e.
“Juventude tenke banati espíritu 12 Novembru hosi ohin ba oin, liuliu iha situasaun kontribui luta ba kombate COVID-19 no hasa’e taxa partisipasaun vasina,” PR Lú-Olo enkoraja.
Xefe Estadu mós enkoraja ba juventude ohin loron atu kontinua kapasita aan hodi envolve an iha prosesu dezenvolvimentu atu fó moris di’ak ba povu.
“Juventude ohin loron tenke buka valoriza-an uluk liuhosi estudu atu sai profisionál efisiente no efetivu, nune’e bele intervein di’ak liután iha programa rekuperasaun ekonómika atu hasa’e moris-diak ba povu tomak,” Xefe Estadu enkoraja.
PR mós husu ba sobrevivente loriku asuwa’in atu kontinua sai mestre ba juventude ohin loron atu hadomi povu no pátria.
Tuir dadus hosi Komisaun Interministeriál ba Implementasaun vasina COVID-19, hatudu populasaun iha territóriu nasionál ne’ebé simu ona vasina doze daruak ka kompletu atinje ona 51,0%, ne’ebé ekivalente ho 384,744.
Ba populasaun ne’ebé simu ona vasina doze dahuluk iha munisípiu Dili hamutuk 178,386 ho 83,4% no doze daruak hamutuk 158.621 ho 74,2%.
Nune’e mós, kobertura vasinasaun ba populasaun idade 12 to’o menus hosi 18, hahú iha loron 27 outubru to’o loron 10 novembru 2021 ba doze dahuluk iha munisípiu Dili hamutuk 15.002 ho 25,9%.
Notisia Relevante: Vasina doze daruak iha territóriu nasionál atinje ona 51%
Jornalista : Nelson de Sousa
Editór : Florencio Miranda Ximenes
