DILI, 13 novembru 2021 (TATOLI)—Timor-Leste Press Union (TLPU) realiza Kongresu Extraordiáriu ho tema ‘Hametin estrutura hodi haree ba futuru’, iha sábadu ne’e, iha salaun Delta Nova, hodi hili estrutura foun.
Iha votasaun ne’ebé partisipa hosi kongresista hamutuk 180, mosu pakote rua, kompostu hosi pakote A, Prezidente Jordão Henrique, Vise-Prezidente Noemio Falcão, Sekretáriu Jerál Venidora Oliveira, Vise-Sekretáriu Jerál Julito Ximenes no Tezoreira Rosa Prega, ne’ebé pakote ne’e hetan votu 43.
Enkuantu, pakote B, Prezidente Candido Alves, Vise-Prezidente Embelina Amaral, Sekretáriu Jerál Zezito da Silva, Vise-Sekretáriu Jerál Marselino Bata no Tezoreira Efigenia Texeira, hetan votu 135.
Nune’e, pakote B ne’ebé lidera hosi Jornalista Senior, Candido Alves, hetan votu maioria hodi lidera TLPU ba períodu tinan haat, hahú tinan 2021 to’o 2025.
Kongresu Extraordináriu ne’e realiza bazeia ba artigu 19 estatutu TLPU hodi hili filafali Prezidente foun atu garante funsionamentu organizasaun, tanba Prezidente sesante, Manuel Pinto, hatama karta rezignasaun iha loron 23 agostu 2021, ho razaun okupadu ho servisu Estadu, ne’ebé daudaun asume hela knaar hanesan Prezidente Konsellu Diretivu Agência TATOLI, I.P.
Antes ne’e, Manuel Pinto eleitu hanesan Prezidente TLPU iha loron 21 dezembru 2019, ba períodu 2020 to’o 2024, maibé asume kargu ne’e kuaze tinan-rua de’it.
Notísia relevante: Manuel Pinto, Prezidente TLPU 2020-2024
Eleisaun ba estrutura foun ne’e la’o iha ambiente demokrasia no partisipativu, ne’ebé lidera hosi Prezidente meza Lírio da Fonseca, Vise-Prezidente Cipriano Colo no Sekretária Venidora Oliveira.
Biban ne’e, Prezidente eleitu, Candido Alves, hato’o agradesimentu boot ba konfiansa hosi membru no komprometidu sei serbisu ho estrutura tomak atu defende interese membru sira.
“TLPU ita hotu nian, tanba ha’u ne’ebé manan la’ós atu ba iha loron-matan leten, maibé ha’u sei hamutuk ho imi, ita hotu ida de’it mak TLPU, tanba ita-nia misaun mak hakarak rai ne’e di’ak,” nia hateten.
Ba konfiansa ne’e, Candido Alves, hamutuk ho estrutura, sei tau ketak diverjénsia no lolo liman ba malu hodi serví organizasaun, tanba estrutura foun ne’e sei la halo diskriminasaun ba membru sira.
Nune’e mós, Sekretáriu Jerál TLPU, Zezito da Silva, komprometidu sei defende interese organizasaun.
“Hanesan tema ne’ebé iha, ami mai atu lori TLPU ba oin, atu asegura no garante sustentabilidade organizasaun, ami sei fó benefísiu direita ba elementu organizasaun tomak hodi garante ezisténsia organizasaun TLPU nian,” nia subliña.
Nune’e, estrutura foun sei simu pose iha tempu badak no sei konvoka konferénsia nasionál ho objetivu halo revizaun ba estatutu TLPU, ne’ebé iha koordenasaun serbisu ho notariadu Minitériu Justisa.
Ministru Asuntu Parlamentár no Komunikasaun (MAPKOMS), Francisco Jerónimo, enkoraja estrutura foun atu serbisu ho estrutura anteriór hodi hadi’a organizasaun ne’e sai di’ak liután no iha tempu hanesan husu jornalista sira serbisu ho profisionál.
“Ha’u husu ba jornalista sira halo imi-nia knaar ho profisionál, serbisu labele halo fali propaganda ba intesaun ne’ebé mak ofende ema seluk, tanba bainhira ita asume profisaun jornalista, ita iha responsabilidade maski ita komunga liberdade espresaun maibé ita labele haluha katak liberdade ne’e iha ninia responsabilidade,” nia subliña.
Governante ne’e husu ba estrutura foun TLPU, ba oin presiza haree situasaun sira ho di’ak, nune’e labele hamosu dezentendimentu ba malu.
“Hakarak fó parabéns ba Señor Candido ne’ebé eleitu ba Prezidente TLPU no ninia estrutura tomak, ba ita-boot sira-nia dedikasaun no prontidaun asume responsabilidade, hodi hala’o knaar durante tinan-haat, hein katak ho ita-boot nia lideransa bele halo netik buat ruma ba organizasaun, kontinua saida mak estrutura anteriór halo no hadi’a saida mak seidauk di’ak,” Ministru hameno.
Aleinde ne’e, iha kongresu ne’e, simu membru foun hamutuk 34, kompostu hosi mane 20 no feto 14.
Iha ámbitu ne’e, TLPU hamosu rezolusaun no rekomendasaun ba Governu liuhosi MAPKOMS, atu halo revizaun ba Projetu Dekretu-Lei ba kriasaun subsídiu profisionál ne’ebé hala’o atividade jornalístika durante mitigasaun COVID-19, tanba la konkorda ho montante ne’ebé atribui ba jornalista liña frente.
.Jornalista : Arminda Fonseca
Editora : Julia Chatarina
