BAUCAU, 12 novembru 2021 (TATOLI) – Governu liuhosi Sekretaria Estadu Juventude no Desportu (SEJD) iha tinan oin sei loke jogu komunitária hodi deskobre no promove talenta juventude sira iha modalidade futeból.
“Ita hein katak desportu komunitária daudaun ne’e sei hala’o mós iha Timor laran bele deskobre povu simples sira-nia oan ne’ebé iha talentu atu sai selesaun nasionál ka bele reprezenta no fó urgullu ba ita-nia rai no família,” Sekretáriu Estadu Juventude no Desportu, Abrão Saldanha ‘Nokosiku’, ko’alia iha kampu futeból Triloka, sesta ne’e.
Objetivu SEJD promove fali desportu komunitária tanba atu hametin koezaun, relasaun ema ho ema iha komunidade, fatin ba ema atu idak-idak partisipa ativamente iha sira-nia suku no aldeia.
Nune’e mós desportu komunitária fatin ba atu deskobre talentu povu nia oan sira iha suku, aldeia sira hodi hetan sira-nia talentu.
“Governu hakarak hahú fali atividade sira hosi baze, desportu komunitaria tinan-tinan sei realiza fali ne’ebé hanaran festivál munisipál desportiva, iha planu tinan oin sei realiza,” Abrão akresenta.
Nia husu munisípiu Baucau no nunisípiu seluk atu prepara-aan tanba atu hametin liután koezaun hanesan nasaun no bele deskobre di’ak liután foinsa’e sira-nia talentu.
Prezidente Autoridade Munisípiu (PAM) Baucau, Olívio ‘Bou-Lesa’ Freitas, jogu ne’e importante ba foinsa’e sira hodi deskobre talenta jogadór foinsa’e sira.
“Ba jogadór sira-ne’ebé agora atu kompete, iha momentu ida-ne’e tenki iha espíritu desportivu, ha’u lakohi haree tuku, tebe, duni=malu iha kampu laran,” PAM Baucau fó hanoin ba futebolista sira.
Bainhira hamosu problema, entaun juventude rasik la fó valor ba eroi sira-ne’ebé oferese-aan ba mate, ne’e duni hatudu jogu ho espíritu desportiva no tuir regra nune’e fó valoriza ba eroi sira.
“Dalabarak ema sempre dehan kuandu jugu sempre muturabu (problemátiku), ohin ba oin labele tán halo aktu hanesan ne’e, joga ho disiplina no ho regra, labele hanoin prémiu tanba atu motiva de’it maibé la’ós hadau depois ikus mosu problema,” Bou Lesa enkoraja futebolista sira.
Jornalista : Natalino Belo
Editór : Evaristo Soares Martins
