DILI, 14 novembru 2021 (TATOLI)— Governu liuhosi Ministériu Administrasaun Estatál (MAE) no Autoridade Munisipál Dili, deside re-aloka vítima inundasaun iha sentru akollimentu Manleuana ba alojamentu provizóriu ka kost.
“Ho akontesimentu udan boot horisehik, iha lokraik tuku 18:30 otl, Ministru Administrasaun Estatál telefone kedas ha’u ho Diretór nain-tolu, ami tun kedas mai iha fatin deslokadu ne’e to’o tuku 10:00 kalan, no ami muda kedas família uma-kain neen ba iha kost, família neen ne’e, ami fó prioridade ba inan isin-rua, inan-sira idade ho labarik kiik. Sira nia sasan mós ami hasai no lona sira mós ami sobu, agora ami mai filafali tuir orientasaun katak tenke hasai hotu sira,” Prezidente Autoridade Munisípiu Dili, Guilhermina Filomena Saldanha Ribeiro, hateten, iha sentru akollimentu Manleuana-Dili domingo ne’e.
Notísia Relevante: Lona sai mahon ba vítima inundasaun iha Manleuana hahú nakles
Vítima dezastre naturál iha 4 abríl ne’e, Governu re-aloka ba kost ne’ebé selu hosi Governu, no prevee ba fulan-neen.
Governu prevee orsamentu $200.000 hodi aluga kost ba abitante vítima sira hela, durante fulan neen.
MAE foku faze dahuluk mak muda sai abitante sira hosi sentru akollimentu hafoin re-idenfika tuir lista ne’ebé iha atu fasilita sira ne’ebé hakarak atu ba sira-nia munisípiu.
“Deslokadu (vítima inundasaun) iha Manleuana ne’e hamutuk ema-41, ne’ebé hasai ona neen, restu sei hasai tan ka muda hotu, ” nia akresenta.
Autoridade máxima ne’e husu ba vítima inundasaun no nain ba kost atu tau konfiansa ba Governu. Kost ne’ebé governu prepara kada família diferente katak balun hetan kuartu rua no balun ida de’it depende númeru família.
Iha biban hanesan, Reprezentante vítima inundasaun Manleuana, Carlito Exposto Sarmento, preokupa ho desizaun Governu tanba loron ba loron foti dadus maibé rezultadu laiha.
“Loos duni katak, hafoin udan MAE no Bombeiru mai iha ne’e no konsege lori família uma-kain neen ba kost, hodi hein prosesu ba oin,” nia haktuir.
Nune’e, reprezentante ne’e husu ba governu atu foti desizaun ida loloos, nune’e bele re-aloka sira ba fatin seguru atu labele sai vítima ba dala-rua.
Dadaun ne’e, PAM Dili halo ona koordenasaun hodi prepara transporte atu tula populasaun sira. tanba iha sábadu kalan sira iha ona konkordansia hodi muda provizória ba kost, nune’e mós koordena ona ho kost nain.
Notísia Relevante: SEPS apoia lona foun-alimentár ba família vítima inundasaun 135
Jornalista : Antónia Gusmão
Editór : Florencio Miranda Ximenes
