DILI, 15 novembru 2021 (TATOLI)–Aviaun Citilink kuaze oras ida para de’it iha Aeroportu Internasionál Comoro, tanba bee nakonu iha pista impaktu hosi udan-boot iha oras balun nia-laran.
Prezidente Konsellu Administrasaun Aeroportu no Navegasaun Aérea Timor-Leste, Empreza públika (ANATL, E.P) José Trindade da Cruz Pinto, hateten, aviaun Citilink tun iha aeroportu iha meiu dia tuku 12:00 otl, maibé atu filafali tarde tanba bee boot sa’e hosi rotunda Nicolau Lobato, mai tomak tama to’o aviaun nia para fatin laran.
“Bainhira pasajeiru sira iha hotu aviaun laran, aviaun labele semo tanba bee tama to’o pista aeroportu laran, nune’e impaktu aviaun semo tarde. Maski nune’e, ekipa sira esforsu oioin hodi ikus mai aviaun ne’e bele semo filafali,” José Trindade informa iha Aeroportu Internasionál Prezidente Nicolau Lobato, Comoro, segunda ne’e.
Antes ne’e, iha valeta hodi lori bee sai, maibé valeta ne’e taka tiha, entaun bee sai ladi’ak, nune’e aviaun labele halo operasaun.
“Tanba bee sa’e besik mákin maka’as, aviaun sente la seguru, nune’e labele traballa, entaun presiza karreta para dada oitoan ba rai-maran, nune’e aviaun traballa fali. Situasaun ne’e la’ós foin akontese, dala barak ona kuandu tempu udan kada-tinan, durante tinan hirak nia-laran ona kuandu udan ona bee sai fatin laiha kauza hosi drainajen ladi’ak,” nia esplika.
Razaun seluk mak ho klima ne’ebé ladún di’ak, nune’e aviaun para hein oitoan hafoin ne’e maka semo hikas.
“Akontesimentu ne’e bele fó impaktu ba connecting flight, ne’ebé hanesan jestór aeroportu ami halo planu dala hira ona maibé tinan hirak nia-laran kuaze la realiza, tanba planu konstrusaun no hadi’a infraestrutura aeroportu ne’e tama hotu ona iha projetu boot, tanba ne’e maka ami labele halo buat ida, ami só bele hadi’a buat kiik-oan sira hanesan hamoos valeta no seluk tan,” nia haktuir.
Responsável ne’e sente preokupadu ho situasaun ne’e, maski la estraga fasilidade aeroportu durante udan boot, maibé afeta de’it ba pista aviaun.
Jornalista : Antónia Gusmão
Editora : Julia Chatarina
