BAUCAU, 15 novembru 2021 (TATOLI) – Juventude hosi suku tolu iha postu administrativu Baucau vila, munisípiu Baucau hamutuk na’in-50 partisipa formasaun ai-han di’ak ba moris di’ak hosi organizasaun Hamutuk Ita Ajuda Malu (HIAM).
Objetivu hosi formasaun ne’e ba juventude no grupu to’os na’in sira atu eleva koñesimentu no abilidade iha área ortikultura no nutrisaun. Nune’e mós formasaun ne’e kontinua kuda produtu agríkola hodi produs ai-han ne’ebé iha nutrisaun hanesan modo no ai-fuan.
“Timor-Leste ita iha defisiénsia ba má-nutrisaun, liuliu ba labarik tinan 0-5, ita hakarak eleva kapasidade no abilidade juventude no agrikultór sira atu nune’e bele kuda ai-han sira-ne’ebé iha nutrisaun di’ak atu nune’e bele konsume iha família no komunidade ein-jerál,” Vise-Diretór HIAM, António Guterres, ko’alia iha salaun apuramentu administrasaun munisipál, Vila Nova, segunda ne’e.
Partisipante sira mai hosi juventude suku tolu hamutuk na’in-50 komposta hosi Triloka, Bahu ho Buruma, postu administrativu Baucau vila.
HIAM nafatin iha komitmentu atu kontinua hatutan no habelar ba juventude tomak atu nune’e labele kuda de’it hare, talas no fehuk maibé kombinasaun ho hahaan nutritivu hanesan modo no ai-fuan.
“Espera katak sira bele implementa iha idak-idak nia fatin atu nune’e bele ajuda ekonomia no nutrisaun família nian,” António hateten.
Antes ne’e, HIAM apoia juventude na’in-20 liuhosi kapasitasaun inklui materiál, ekipamentu, fini no tún dereita harii to’os ortikultura nian. Juventude na’in-20 ne’e mai hosi postu admistrativu Venilale no Baucau hanesan suku Triloka, Bahu, Buruma, Uma Ana Ulu, Uma Ana Iku no Fatulia.
“Sira prodús modo no lori ona produtu ba merkadu no família konsume ona modo ne’ebé sira kuda,” António akresenta.
HIAM rasik hetan apoia hosi Governu Nova Zelándia liuhosi embaixadada iha Timor-Leste liuhosi programa foreign affairs trade, AID Programme ho durasaun tinan ida, ne’ebé tuir planu sei ensera iha loron 30 fulan-novembru.
Iha fatin hanesan, partisipante juventude hosi suku Triloka, Laurentina Ximenes, kontente tanba bele aprende no hasa’e koñesimentu iha área agrikutura, liuliu hahán nutritivu hanesan kuda ai-fuan no modo.
Jornalista : Natalino Belo.
Editór : Evaristo Soares Martins
