LACLUBAR, 14 novembru 2021 (TATOLI)-Temperatura mundiál aumenta, dezastre naturál hanesan anin-boot, udan-boot, rai-maran, inundasaun no tasi-sa’e ka tsunami, tanba kontribui husi atividade umana.
Hahalok ema nian sira hanesan efeitu estufa, aumenta emisaun, akesimentu globál, mudansa iha órbita terrestre, fó impaktu ba seres-vivos sira hanesan ai-horis, balada no ema. Realidade mak hanesan ekstinsaun ekosistema, mudansa iha rezultadu ai-han no produtu florestál, área kosteira sira sai vulnerável ba aumenta nível tasi nian no ba erosaun kosteira, saúde umana, no seluktan.
Mudansa klimátika sira ne’e, ohin loron, sai dezafiu boot ba mundu, inklui Timor-Leste rasik. Ho dezafiu boot ida ne’e maka Organizasaun Nasaun Unida (ONU) iha tinan 2015 hamosu Objetivu Dezenvolvimentu Sustentável (ODS) ho ajenda 17 ba tinan 2030, ne’ebé mak inklui Mudansa Klimátika ho Rezolusaun 70/1, Asembleia Jerál ONU nian, hodi toma medida urjente, hodi komate mudansa klimátika no nia impaktu sira.
Refleta ba ODS, no situasaun klimátika ne’ebé mundu enfrenta, Uniaun Europeia no Ministériu kooperasaun no dezenvolvimentu ekonómiku alemanha (BMZ) hamosu parseria ba Agroflorestal Sustentavel Ai ba Futuru (PSAF), prodús filme dokumentáriu tolu hanesan; 1) Oan mane husi Manukoko, guarda husi ai-hun sira, 2) Ai ba moris, 3) Ai hun tolu, istória tolu no making of ida; Istória tolu, nasaun ida Timor-Leste furak’.
Produsaun Tatoli I.P ©2021
