DILI, 16 novembru 2021 (TATOLI)–Ministériu Ensinu Superior Siénsia no Kultura (MESSK) hamutuk ho instituisaun ensinu superiór públiku no privadu hamutuk 16, asina akordu faze daruak ba pagamentu inzensaun propina ba estudante 34.307 ho totál millaun $4.
Ministru Ensinu Superiór Siénsia no Kultura, Longuinhos dos Santos, hateten, universidade sira relata ona relatóriu, tanba ne’e MESSK haruka ba Ministériu Finansa (MF) atubele halo transferénsia orsamentu ba konta bankária instituisaun ensinu superiór sira.
“Akordu ne’ebé hala’o ho reitór sira hosi universidade 16 hodi prienxe rekizitu ida hodi loke dalan MESSK submete relatóriu ba Ministériu Finansa, nune’e bele realiza pagamentu propina semestre daruak,” Ministru informa iha salaun enkontru ministériu, Colmera, tersa ne’e.
Antes ne’e, iha loron 14 no 15 jullu, MF transfere verba ho montante millaun $5,6 ba konta universidade 18, hodi realiza izensaun pagamentu propina ba estudante hamutuk 64.619, durante loron 90 nia laran, hahú loron 16 jullu to’o 16 outubru.
Nune’e, universidade reembolsa direita verba ba estudante regularmente inskritu ka ativu iha tinan letivu 2021, iha kursu titulár lisensa, liuhosi izensaun propina ba semestre dahuluk, ne’ebé iha loron 15 nia laran tenke halo relatóriu ba MESSK no bele aprezenta hahú loron 15 to’o 30 outubru.
Notísia relevante: MF realiza pagamentu izensaun propina ba estudante ensinu superiór 64.619
Tuir Ministru, daudaun ne’e falta Universidade Nasionál Timor Lorosa’e (UNTL) no Institutu Profisionál de Canossa mak seidauk asina akordu ho MESSK tanba Instituisaun rua ne’e presiza hadi’a dadus balun.
“Antes ne’e universidade rua submete ona dadus, maibé hafoin ita halo verifikasaun, hatudu katak presiza hadi’a. Tanba ne’e ita devolve atu sira hadi’a hafoin submete atu ita bele haruka ba Ministériu Finansa. Maski Instituisaun rua ne’e sei iha hela faze hadi’a dadus, maibé sira labele hein tan tanba prosesu finansiamentu iha Ministériu Finansa tama fulan-dezembru sei taka sistema,” nia akresenta.
Tanba ne’e, MESSK deside bainhira ekipa halo verifikasaun ba universidade ne’ebé hatama proposta no hatudu laiha problema maka bele asina akordu.
Jornalista : Tomé Amado
Editora : Julia Chatarina
