COVALIMA, 16 novembru 2021 (TATOLI)—Diretòr Transporte Terrestre Munisípiu Covalima, Juaquim Gusmão informa, motorista sira hala’o teste prátika hodi lori motor halai tama roda iha auto estrada, tanba udan halo kondisaun kampu futebol eis SMP Sándalo nakonu ho taho no defisil ba motorista sira atu halo teste prátika.
Notísia Relevante: Motorista 1.878 tuir teste prátika atu hetan karta kondusaun
“Ita hatene Covalima bainhira lorokoraik udan no iha kampu eis SMP Sándalo nakonu ho tahu halo motorista sira labele tuir teste pratika motor halai tama roda. Nune’e, ha’u haruka karta ba Administradór hodi husu motorista sira atu tuir teste prátika iha auto estrada area Leogore Ranok,” Juaquim Gusmão informa ba Agência Tatoli, iha auto estrada àrea Leogore Ranok, Covalima, tersa ne’e.
DTT Covalima deside hodi muda fatin teste prátika ba motorista sira hodi hetan karta kondusaun, tanba kondisaun mak la permite atu uza kampu ne’ebé nakonu ho taho, nune’e halo motorista sira dada de’it karreta ho motor.
Konaba muda Fatin nia dehan, DTT Covalima haruka karta ba adminitradór Covalima, Francisco de Andrade, hodi husu autororizasaun.
“Ami ko’alia ho administradór no administradór mós autoriza, ami bele uza auto-estrada halo motorista sira tuir teste prátika hodi hetan karta kondusaun. Ita uza-auto estrada la’ós atu estraga maibè atu fasilita motorista sira hodi bele hetan karta kondusaun,” nia haktuir.
Adminitradór Munisípio Covalima, Francisco de Andrade, hateten motorista sira tuir teste prátika iha auto-estrada ne’e hetan autorizaun hosi auutoridade munisipál.
“Maske hetan kritika iha mídia sosiál maibé sira lahatene situasaun. Se ita haruka motorista sira tuir teste pr’atika halai tama roda iha kampu futebol eis SMP Sándalo me’ebé nakonu ho taho, ita estraga kampu. Entaun, DTT husu lisensa iha ha’u no ha’u autoriza,” Francisco klarifika.
Nia parte autoriza DTT uza auto-estrada hodi motorista sira halo teste prátika atu hetan karta kondusaun ne’e hodi utiliza auto-estrada ne’ebè mak transporte públiku la halo movimentu ba no mai.
Motorista, Brígida Cardoso, hateten nia tuir teste prátika iha auto-estrada tanba kampu futebol eis SMP Sândalo nakonu ho taho entaun laiha kondisaun atu atiliza fatin ne’e.
“DTT deside muda fatin teste prátika tanba udan halo ami tuir teste prátika la di’ak, tanba kampu nakonu ho tahu. Entaun, DTT Covalima deside muda fatin iha auto-estrada, nune’e ami be;e tuir teste prátika hodi halai tama roda,” nia dehan.
Bazea ba oráriu hosi Dirasaun Transporte Terrestre Covalima, motorista sira hahú hala’o teste prátika hodi hetan karta kondusaun iha loron 08 novembru ne’ebè sei ramata iha loron 17 fulan ne’e.
Jornalista : Celestina Teles
Editór : Cancio Ximenes
