COVALIMA, 17 novembru 2021 (TATOLI)—Prezidente Komisaun Organizadór 28 Novembru munisípiu Covalima, Francisco Alves informa, komunidade Covalima sei komemora loron proklamasaun independénsia 28 Novembru ba dala-46 ho atividade desportu komunitáriu.
“Ami halo ona enkontru ba datolu no kada sesaun aprezenta ona atividade ho totál orsamentu hamutuk $12,800.00, ne’ebè sei fahe ba kada sesaun nia montante la hanesan no ami preparadu ona,” Francisco Alves hateten ba Agência Tatoli, iha nia knaar fatin, kuarta ne’e.
Orsamentu $12,800.00 ne’e, osan $4,500.00 sei aloka ba postu administrativu sira, ne’ebé postu administrativu sei hetan orsamentu $750.00 realiza atividade hodi komemora loron proklamasaun independénsia 28 Novembru.
Preparasaun komemorasaun loron Nasionál refere iha postu Suai Vila sei realiza atividade kompetisaun desportu komunitáriu no animasaun kulturál no seluk tán.
Tanba ne’e, komisaun sira sei prepara prémiu ba manan-na’in sira ho orsamentu másimu $50 mínimu $25.00, maibe prémiu la’ós sai fatór ida, maibé hanesan atu envolve komunidade bele kontente iha loron ida-ne’e.
“Ita sei iha atividade desportu komunitáriu dada tali, halai-taru kuda, dansa kulturál, kompetisaun kanta ba estudante sira, poezia, no seluk tán. Tanba ne’e, ami sei prepara prémiu balun atu nune’e bele fó ba manan-na’in sira. Iha postu Suai Vila ne’e, suku lima (5) mak tuir kompetisaun mak suku Debos, Beko, Camnasa, Suai Loro no Labarai,” nia dehan.
Orsamentu ne’ebé administrasaun munisipál aloka ba komemorasaun loron proklamasaun independénsia 28 Novembru hamutuk $12,800.00, ne’ebè aloka ba postu administrativu sira hamutuk $4,500.00.
Hosi orsamentu ne’e sei aloka mós ba sesaun sekretáriu $2,786 .00, protokolu $88,00, liturjia no korru $460.00, ekipa isar bandeira Nasionál $1,175.50, parada no formatura $45.00, lojístika $924.50, mobilizasaun $45.00, limpeza $216,50, konsumsi $1,022.50, dekorasaun $189.00, primeiru sokorru $81.00, seguransa $140.00, desportu $2,230.00, feira no bazar $500.00, animasaun kultura $600.00, Currida de Cavalo $1,892.00.
Postu administrativu neen (6) komemora loron proklamasaun independénsia 28 Novembru iha sira-nia postu rasik no postu administrativu Suai Vila sei realiza kompetisaun hirak ne’e, sei partisipa hosi suku Debos, Beko, Camnasa, Suai Loro, Labarai ne’ebè Covalima sei realiza serimónia isar bandeira iha Postu Suai sei realiza iha Kampu futebol Ladi.
Jornalsita : Celestina Teles
Editór : Cancio Ximenes
