MANUFAHI, 16 novembru 2021 (TATOLI)—Prezidente Repúblika, Francisco Guterres Lú Olo, sente kontente ho populasaun Manufahi tanba bele realiza vizita no bele rona direta preokupasaun sira hosi komunidade liuhosi diálogu.
Notísia Relevante: PR presta omenajen ba Don Boaventura antes hala’o diálogu ho komunidade
“Ha’u sente kontente tebe-tebes atu mai hamutuk ho populasaun sira iha distritu Manufahi hodi fahe informasaun no simu informasaun hosi ita-boot sira-nia lala’ok moris nian, lala’ok ukun nian iha ita-boot sira-nia ukun iha ita-boot sira-nia munisípiu ida-ne’e,” Prezidente Repúblika hateten iha ninia diskursu bainhira hala’o diálogu ho komunidade iha salaun Parokiál Manufahi, kuarta ne’e.
Presidente Republika hateten, nia parte kontente tebe-tebes tanba moras aat ne’ebé mak espalla iha mundu tomak ho naran pandemia COVID-19, nune’e halo mundu inklui mós iha Timor-Leste halo ema ida-idak iha nia hela fatin.
Tanba pandemia COVID-19, Prezidente relembra katak tuir loloos vizita ne’e realiza iha fulan-marsu tinan ne’e, maibé tanba kondisaun saude la permite atu realiza vizita iha munisipiu ida-ne’e. Maske nune’e, horisehik konsege realiza duni vizita hodi rona preokupasaun populasaun nian atu bele tetu ho di’ak oinsá mak bele resposta ho loloos ba populasaun.
Administradór Munisípiu Manufahi, Arantes Isaac Sarmento, hateten ho komunidade Manufahi nia naran hakarak fó bem-vindu ba Prezidente Repúblika Francisco Guterres Lú Olo ho nia espoza iha rai ida-ne’e.
“Povu doben munisipiu Manufahi hein hela vizita Prezidente Repúblika, nune’e atu rona mensajen hosi Xefe Estadu nu’udar aman ba nasaun no povu Timor-Leste,” nia dehan.
Jeografikamente iha munispiu Manufahi iha nia área ho luan 1,643.76 Km2, no administrativamente fahe ba postu administrativu haat (4), suku 29, aldeia 137 mak hanesan postu administrative Same iha suku ualu (8), postu Alas iha aldeia 19, postu Fatuberliu iha suku lima (5), postu Turiscai iha suku 11.
Demografikamente bazea ba relatóriu hosi kada suku liuhosi administrasaun postu administrativu mai iha administrasaun munisipiu iha totál populasaun 70,239 no totál xefe familia hamutuk 14,940.
Jornalista : Domingos Piedade Freitas
Editór : Cancio Ximenes
