DILI, 17 novembru 2021 (TATOLI)–Instituisaun Ensinu Superiór tolu hanesan Universidade da Paz (UNPAZ), Universidade de Dili (UNDIL) no Universidade Oriental (UNITAL) submete ona lista estudante finalista 2.101 ba Ministériu Ensinu Superiór, Siénsia no Kultura (MESSK) atu partisipa graduasaun iha dezembru tinan ne’e.
Reitór UNPAZ, Adolmando Amaral, hateten, universidade submete finalista hamutuk 1.200 atu simu graduasaun, iha nível lisensiatura no mestradu hosi fakuldade neen.
“Ita planeia ona graduasaun sei realiza iha loron 21 dezembru tinan ne’e, tanba ne’e daudaun prepara hela atu submete lista graduadu ba MESSK iha loron 20 novembru,” Adolmando Amaral informa ba Agência TATOLI, iha ninia knaar fatin, UNPAZ, iha Ai-mutin, kuarta ne’e.
Notísia relevante: Estudante Baxarelatu IPB na’in-83 sei simu graduasaun semana ne’e
Tuir Reitór, molok realiza seremónia graduasaun, universidade iha obrigasaun aprezenta dadus estudante ba ministériu iha fulan-ida antes, nune’e parte ministériu halo verifikasaun no bainhira lista ne’e laiha problema maka sei públika uluk naran estudante mak foin graduasaun.
Iha sorin seluk, Reitór UNDIL, José Agostinho Belo, informa, parte universidade submete ona lista estudante finalista hamutuk 400-resin ba ministériu.
Estudante sira hosi fakuldade neen hanesan Siénsia, Polítika, Direitu, Ekonomia, Edukasaun no Tékniku inklui departementu 10.
Nune’e mós, Reitór UNITAL, Florindo Pereira, hateten, parte universidade aprezenta lista estudante finalista hamutuk 501 ba MESSK iha semana rua liu ba.
“Maibé to’o agora seidauk iha rezultadu, karik sira verifika hotu ona mak sei iha informasaun ba universidade,” nia dehan.
Estudante finalista hosi UNITAL hosi fakuldade hitu hanesan Ekonomi, Enjeñaria, Saúde, Diretu, Edukasaun Agrikultura inklui Sosiál no Polítika.
Jornalista : Tomé Amado
Editora : Julia Chatarina
