DILI, 18 novembru 2021 (TATOLI)- Diretór Jerál Sekretária Estadu Protesaun Sívil (SEPS), Ismael Babo, hateten, daudaun iha koordenasaun ho Autoridade Munisípiu Dili atu re-aloka tan vítima inundasaun na’in-11, ne’ebé hela iha sentru akollamentu Hera ba alojamentu provizóriu ka kost.
“Ita nia Autoridade Munisípiu Dili sei muda tan xefe família iha sentru akollamentu Hera na’in 11 ba kost. Daudaun, família vítima dezastre naturál ne’ebé hela iha sentru akollamentu hamutuk 130, kompostu hosi vítima na’in-41 iha kampu Real-Madrid Manleuana, Rate Ain- Manleuna ho uma-kain hitu, maibé vítima hirak ne’e, Ministériu Administrasaun Estatál (MAE) liuhosi Autoridade Munisipiu Dili muda ona ba kost,” Diretór Jerál ne’e, hateten, ba Agência TATOLI via telefónika, kinta ne’e.
Nótisia Relevante: Governu deside re-aloka vítima inundasaun iha Manleuana ba alojamentu provizóriu
Alende ne’e, abitante afetadu na’in-35 iha sentru akollamentu Dom Bosco Comoro, seidauk bele re-aloka, maski hela iha lona okos, maibe dada iha uma okos ne’ebé udan mos la fó impaktu.
“Ita nian maluk sira iha sentru akollamentu Metiaut, hamutuk uma kain -37, seidauk muda ba kost. Tanba Ministériu Administrasaun Estatál (MAE) no Autoridade munisípiu Dili mak responsavél re-aloka sira ba alojamentu provizóriu,” nia akresenta.
Entretantu, Governu liuhosi Ministériu Administrasuan Estatál (MAE) liuhosi Autoridade Munisipál Dili, deside re-aloka vítima inindasaun iha sentru akollimentu Manleuana ba alojamentu provizóriu ba kost
Governu prevee orsamentu $200.000 hodi aluga kost ba abitante vítima dezastre naturál iha 4 abríl hela, durante fulan-neen.
Oitavu Governu Konstitusionál mós finaliza ona estudu viabilidade no dezeñu detalladu ba konstrusaun sentru akollamentu multifunsaun ba vítima inundasaun no abitante hela iha fatin risku iha fatin tolu ho rai ektare 12.
Hafoin inundasaun iha loron 04 abríl 2021, ema hamutuk na’in-34 mak mate no na’in-14 mak lakon iha nivél nasionál, família hamutuk 30.322 mak afeta ba inundasaun, ne’ebé entre família sira ne’e, família 24,816 hosi munisípiu Dili no uma hamutuk 4.231 mak hetan estragu totál.
Nótisia Relevante: Governu finaliza ona dezeñu detalladu ba sentru akollamentu multifunsaun
Jornalista : Natalino Costa
Editór : Florencio Miranda Ximenes
