VIQUEQUE, 18 novembru 2021 (TATOLI)-–Komisaun Reguladór Arte Marsiál (KRAM) munisípiu Viqueque, kinta ne’e organiza estudante Eskola Sekundáriu Jerál (ESJ) Calixa hamoos letra arte marsiál sira ne’ebé marka iha parede iha villa laran.
“Ohin, ami realiza programa rua, ida sensibiliza sub KRAM ba estudante Calixa no organiza ita-nia estudante hodi halo limpeza naran arte marsiál sira ne’ebé iha parede sira iha Viqueque,” Prezidente KRAM Viqueque, Cosme Sarmento, hateten ba Agência TATOLI, durante hala’o atividade iha Igreja Katólika Viqueque villa, kinta ne’e.
Limpeza dahuluk hosi loja esperansa no Igreja Katólika Viqueque, ne’ebé sei hamoos liafuan arte marsiál sira hanesan IKS, PSHT, KORKA no 77.
“Ami haree kuaze iha fatin-fatin, organizasaun ninia naran maka barak liu. Tanba ne’e, ami tun hamutuk ho estudante sira atu koko hamoos hotu. Ami mantein desizasaun KRAM iha nasionál,” nia akresenta.
Atividade ne’e hanesan ikus ba tinan-2021, tanba iha tinan kotuk, ho evolusaun COVID-19, labele realiza atividade.
“Husu joven Viqueque labele marka tan naran arte marsiál iha parede sira. Joven sira tenki respeita organizasaun arte marsiál ne’ebé imi envolve ba,” nia fó hanoin.
Iha fatin hanesan, Diretór ESJ Calixa, Rozito Soares do Rosário, hateten antes ne’e KRAM koordena ho parte eskola hodi envolve estudante hala’o atividade.
“Liuhosi limpeza ne’e, ita hatudu ba komunidade katak buat ne’ebé hakerek iha parede imajen ladi’ak. Tanba ne’e, estudante hamutuk ho profesór Calixa tun hodi hamoos,” nia dehan.
Atividade ne’e realiza durante loron ida, hahú tuku 10:00 dadeer to’o ramata, ne’ebé envolve estudante hamutuk 40, kompostu hosi feto na’in-20 no mane na’in-20, inklui profesór Calixa na’in-10.
Jornalista : Vitorino Lopes da Costa
Editora : Julia Chatarina
