DILI, 18 novembru 2021 (TATOLI)—Ministru Administrasaun Estatal (MAE), Miguel Pereira de Carvalho ho Embaixadór Austrália ba Timor-Leste, Peter Roberts, inaugura konstrusaun sistema bee-moos gravitasaun iha aldeia Sinlelo, suku Leguimea, postu administrativu Ermera Villa, munisípiu Ermera.
“Orsamentu ba konstrusaun sistema bee-moos gravitasaun ba faze 1 siklua III ne’e, fundu mai hosi Governu Austrália ho programa rezilénsia komunitária rekuperasaun ekonomia (RKRE) ho totál montante hamutuk $29,105.87, ne’ebé uza halo kaptasaun 2, tanke rezerva 3, torneira públiku 11 ho distánsia 4km,” refere komunikadu imprensa ne’ebé Agência Tatoli asesu, kinta ne’e.
Iha serimónia inaugurasaun ne’e, Ministru Administrasaun Estatál, Miguel Pereira de Carvalho hateten ba komunidade atu utiliza bee-moos ne’e ho kuidadu no tau matan labele estraga fasilidade ne’ebé iha ona, atu nune’e bele uza ba tempu naruk.
Entretantu, Governante ne’e mós hato’o agradese ba Governu Austrália liuhosi Embaixadór Austrália ba Timor-Leste, Peter Roberts, tanba bele apoia ona Governu Timor-Leste liuhosi Programa Nasionál Dezenvolvimentu Suku (PNDS).
Embaixadór Austrália ba Timor-Leste, Peter Roberts, agradese ba Ministériu Administrasaun Estatal no hato’o mós parabéns ba komunidade iha Suku Leigumea ne’ebé konvida ona nia atu haree rasik rezultadu hosi konstrusaun sistema bee-moos iha Suku Leguimea ne’ebé komunidade rasik mak foti dezisaun no servisu makaas hodi konstrui konstrusaun bee-moos ne’ebé di’ak.
Iha serimónia inaugurasaun ne’e, benefisiáriu hosi Suku Leguimea agradese ba fasilidade ne’ebé Governu oferese ba sira liuhosi programa PNDS ne’ebé konstrui bee-moos ba sira, tanba durante tinan barak sira kuru bee-mos iha bee-matan ho distánsia ne’ebé dook.
Serimónia inaugurasaun ne’e partisipa hosi Ministru Administrasaun Estatál, Embaxadór Austrália, Vise Komisaun E Parlamentu Nasionál, Provedari PDHJ, Prezidente Autoridade Munisípál Ermera, Diretora ST-PNDS, Diretor Delegasaun PNDS Munisípiu Ermera, Team Leader Partisipa, liña ministeriál munisípiu Ermera, komandate FDTL munisípiu Ermera, komadante Polísia munisípiu Ermera, autoridade lokál munisípiu Ermera, funsionáriu PNDS no kumunidade suku Leguimea.
Jornalista : Nelia Fernandes
Editór : Cancio Ximenes
