VIQUEQUE, 18 novembru 2021 (TATOLI)–Ministériu Agrikultura no Peska (MAP) munisípiu Viqueque, distribui ona fini batar ba postu lima, iha loron 16 novembru, hodi fahe ba povu agrikultór sira kuda iha to’os.
“Ita fahe fini ba extensionista no sira fahe tutan ba agrikultór sira hodi kuda. Distribuisaun ne’e fó prioridade ba agrikultór vulnerável, tanba fini ne’e la naran fahe, só ba agrikutór kbiit laiha ho kategoria hanesan uma-kain vulnerável mak ita fó ba sira hodi kuda,” Diretór MAP Viqueque, Carlos Pinto, hateten, ba Agência TATOLI, iha ninia knaar fatin, Viqueque, kinta ne’e.
Notísia relevante: MAP-FAO organiza grupu agrikultór munisípiu haat vizita Viqueque
Munisípiu Viqueque daudaun ne’e hetan fini batar hamutuk tonelada 15, kompostu hosi batar ho varidade sele (kinur) tonelada 13 no batar mutin tonelada rua, ne’ebé distribui ona ba suku 36 iha postu lima iha Viqueque, ne’ebé kada suku ida hetan batar kilograma 300 no ema ida hetan kilograma tolu.
“Ohin, ami kontinua fahe iha Uatulari no sesta ne’e ami sei distribui ba postu Ossu no Lacluta, enkuantu postu Viqueque villa ne’e ba direta foti fini iha sentru Raitahu,” nia akresenta.
Durante distribuisaun, extensionista sira hasoru difikuldade falta transporte, ne’ebé dalaruma tula fini iha tratór boot hodi fahe ba populasaun.
“Foin lalais ami fahe ba parseiru sira hanesan Care Internasionál, To’os ba Moris Di’ak (TOMAK) no Catholic Relief Services (CRS) hodi ajuda ami hodi distribui fini. Ami hanoin iha semana ida-ne’e, distribuisaun sei ramata,” nia dehan.
Nune’e mós, nia husu ba povu agrikultór sira labele ansi kuda tanba udan foin maka tun.
“Ita seidauk bele garante katak udan been mak ne’e ona. Tanba dalaruma iha dezenmbru udan para fali,” nia fó hanoin.
Jornalista : Vitorino Lopes da Costa
Editora : Julia Chatarina
