iklan

NASIONÁL, EDUKASAUN, INKLUZAUN SOSIÁL, POLÍTIKA

Governu konsidera família sai xave prinsipál asegura labarik nia futuru

Governu konsidera família sai xave prinsipál asegura labarik nia futuru

Labarik sira selebra loron mundiál ba labarik. Imajen Tatoli/Anito Soares.

LIQUIÇA, 19 novembru 2021 (TATOLI)—Vise-Ministra Ministériu Solidaridade Sosíal no Inkluzaun (MSSI), Signi Chandrawati Verdial, hateten família mak sai xave prinsipál hodi asegura labarik nia future ne’ebé di’akliu.

“Mensajen ba inan-aman sira katak papel Governu nian mak atu refórsa família, maibé familia mak fatin prinsipál ba futuru jerasaun nasaun nian. Tanba bainhira família forte, labarik sira mós sei forte, forte iha komunidade, eskola no ba nasaun. Família la forte, ita sei iha problema sosiál barak tebes,” Signi Chandrawati Verdial hateten iha Selebrasaun Loron Mundial Labarik iha Tibar, Liqúiça, sesta ne’e.

Nia apela ba inan-aman sira nafatin hatudu domin boot ba oan sira, maske hasoru problema oioin labele husik labarik sira abandonadu. Husu ba inan-aman sira presiza iha atensaun ba oan hodi asegura hosi hahalok violentu sira no hadook husi violasaun sira-ne’ebé sei hamate sira-nia mehi.

Tuir dadus, Signi Verdial informa, hosi Uma Mahon 10 ne’e kada tinan deteta labarik 700 mak hetan violasaun oin-oin, maibé sei iha mós labarik barak la konsege deskobre tanba sira ladún toman ho justisa iha TL. Bainhira kazu ne’ebé la’o ho proses naruk hodi halo vitima sira sai vitima ba dala-rua.

“MSSI nia papel mak tau matan ba labarik vitima sira no agora oinsá para ema hotu servisu hamutuk, tau atensaun ba prevensaun atu labele mosu problema hasoru labarik sira,” nia hateten.

Komisária Komisaun Nasionál Direiruu Labarik (KNDL), Dinora Granadeiro, hateten Timor-Leste ratifika ona konvensaun lubuk ida inklui konvesaun direitu labarik no ho ratifikasaun ida ne’e hatudu katak Estadu hakarak proteje labarik sira, maske esforsu ida-ne’e konsidera seidauk natoon ba labarik sira.

“Ita hatene katak esforsu sira-ne’e seidauk hakonu direitu fundamentu haat labarik sira-nian. Eventu ida-ne’e hanesan advokásia ba entidade hotu hodi kontinua tau planu no prioridade atu esforsu sira-ne’e fó biban di’akliu atu goza sira-nia fundamentu iha TL,” nia dehan.

Reprezentante UNICEF iha TL, Bilal Durrani iha nia intervensaun hateten loron labarik nian hanesan momentu ida krusiál iha tempu agora. Ema hotu labele husik hela direitu labarik no bein estar sai fali vitima ba pandemia COVID-19.

“Ami hotu aproveita oportunidade hotu no asaun urjente sira hodi garante ita-nia oan sira-nia futuru no mundu ida maka ita hakarak. Nu’udar reprezentante UNICEF, ha’u promete ba imi hotu katak ami sei halo buat hotu tuir ami-nia kapasidade. Hadi garante imi hotu, espesialmente sira vulneravel liu, iha forsa, saudavel, edukadu no produtivu no seguru liu,” nia hateten.

Jornalista : Cidalia Fátima

Editór        : Cancio Ximenes

iklan
iklan

Leave a Reply

iklan
error: Content is protected !!