iklan

NASIONÁL, INKLUZAUN SOSIÁL, LEI, POLÍTIKA

Traballu infantil aumenta, MSSI husu PN aselera lei protesaun labarik

Traballu infantil aumenta, MSSI husu PN aselera lei protesaun labarik

Labarik sira hala’o atividade faan sasán iha Merkadu Taibesi, tersa (31/8/2021). Imajen Tatoli/Antonio Gonçalves.

LIQUIÇA, 19 novembru 2021 (TATOLI)—Ministériu Solidariedade Sosiál husu Parlamentu Nasionál (PN) hodi aselera lalais lei protesaun labarik, nune’e Governu ho parseiru bele iha matadalan rezolve traballu infantil iha Timor-Leste ne’ebé kontinua aumenta. 

Notísia Relevante: Governu konsidera família sai xave prinsipál asegura labarik nia futuru

Vise-Ministra MSSI, Signi Chandrawati Verdial hateten, asuntu importante ne’ebé presiza foti iha ámbitu selebrasaun loron mundiál ba labarik liu-liu ba Timor-Leste mak oinsá lei ba protesaun labarik ne’ebé iha ona PN bele aselera lalais, hodi tau matan ba labarik sira-ne’ebé kontinua fa’an sasán iha dalan ninin ka traballu infantil.

“Se ita-nia lei ne’e iha ona mak tékniku sira iha baze bele halo servisu di’akliu. Alin sira-ne’ebé faan sasán iha dalan ninin polísia sira atu ba atua mós bele, maibé agora lei protesaun labarik seidauk iha,” Signi Chandrawati Verdial hateten hafoin partisipa iha Selebrasaun Loron Mundiál Labarik iha Tibar, Liquiça, sesta ne’e.

Lei ne’e mak sei kria kondisaun no mekanizmu ba kada instituisaun nia papel hodi foti asaun, tanba iha labarik barak mak ema esplora no obriga sira hodi fa’an sasán, no lei proesaun ba labarik mós bele asegura labarik sira no garante sira-nia justisa bainhira hetan abuzu ruma.

Komisária KNDL, Dinora Granadeiro informa, dadus atual iha territóriu liu-liu iha Dili katak daudaun ne’e rejista ona labarik 300 ne’ebé hala’o traballu infantil hanesan ajuda inan-aman faan sasán iha luron, merkadu no fatin públiku sira inklui iha loron feriadu nasionál sira.

Dadus ne’e mós hatudu katak maiória labarik servisu infantil mai hosi Rejiaun Administrativa Espesiál Oé-Cusse Ambeno (RAEAO), nune’e parte KNDL mós halo ona koordenasaun ho Prezidente Autoridade RAEOA atu lori fila labarik sira ba Oé-Cusse hodi bele kontinua eskola no fó atensaun ba sira.

“Iha labarik 300 mak ami rejista no esforsu ne’ebé mak ami halo mak dadus ne’e sei submete ba ministériu relevante. Kona-ba Oé-Cusse nian ami koordena ho autoridade RAEOA atu sira bele fila ba sira nia rai no kontinua eskola. Maiória sira eskola hela mak ajuda inan-aman,” Kómisaria ne’e hateten.

Notísia Relevante: Plan International rekomenda espesífika kada artigu projetu-lei protesaun labarik ba PN

Nia infórma, lei protesaun labarik sei kontinua iha meza PN no tama ona ba dikusaun liña espesialidade, nune’e espera PN liu -hosi Komisaun F bele foti atensaun ba asuntu ne’e ho lalais.

Hatán ba kestaun ne’e, Sekretária Komisaun F Assuntu Sosiál PN, Elena Martins Belo relata progresu lei protesaun ba labarik la’o di’ak tebes, lei ho númeru 29/5 2020 ho artigu 104 no kapítulu sia (8) dadaun ne’e besik finaliza tanba presiza tan de’it diskusaun dala ida hodi ko’alia kona-ba kapítulu ikus nian.

“Kapítulu ualu finaliza ona no hela ida. Ami sei presiza semana ida ka rua hodi finaliza. Bainhira lei ba ona mak Prezidente Repúblika fó promulgasaun, ne’e sei fó dalan ba entidade hotu atu proteje labarik sira,” nia dehan.

Deputada ne’e husu ba entidade relevante sira liu-liu uma mahon, polísia, sosiedade sivil inklui família sira, hodi asegura labarik no joven sira iha perigu nia laran liu-liu ba sira-ne’ebé hetan violasaun no espera ema hotu bele kumpre regulamentu ne’ebé hakerek ona iha lei refere.

Reprezentante UNICEF, Bilal Durrani, iha nia intervensaun mós rekoñese Governu nia lei no politika kritika sira mak sei nafatin hanesan esbosu hela ba tinan naruk, no la implementa rekursu no sistema sira hodi hakonu labarik timor-oan sira-nia direitu.

Ezemplu, Lei Protesaun Labarik mak pendente desde tinan 2017; Lei Justisa Juvenil mak pendente hahú tinan 2010; Kodigu da Labarik pendente hahú tinan 2012; Kodigu Internasional ba Merkadu Susu-been substitutu mak pendente hahú tinan 2010 inklui Politika Ben Estar ba Labarik no Familia mak pendente hahú tinan 2015.

“Iha Loron Mundiál ba Labarik ne’e, mai ita halo kompromisu atu servisu hamutuk hodi aprova lei no politika esensiál sira ho rápidu posivel,” Reprezentante UNICEF ne’e hateten.

Notísia Relevante: PN hahú diskute projetu-lei protesaun labarik iha espesialidade

Jornalista : Cidalia Fátima

Editór      : Cancio Ximenes

iklan
iklan

Leave a Reply

iklan
error: Content is protected !!