VIQUEQUE, 22 novembru 2021 (TATOLI) – Diretór Servisu Edukasaun Munisípiu Viqueque, Emídio Amaral, relata iha tinan 2021 estudante finalista hamutuk na’in-3.583 mak sei partisipa ezame nasionál.
“Ha’u simu ona dadus estudante finalista hamutuk na’in-3.583 maka sei partisipa ba ezame nasionál ba tinan 2021,” Emídio Amaral informa ba Agência Tatoli, iha ninia kna’ar-fatin, Viqueque, segunda ne’e.
Diretór Servisu Edukasaun Munisipál ne’e hatutan, daudaun ne’e estudante sira prepara estuda tanba ezame nasionál sei realiza iha fulan dezembru 13.
“Kona-ba matéria ba ita-nia estudante simu hotu ona ne’ebé sira agora estuda atu tuir ezame nasionál,” nia haktuir.
Tuir dadus estudante finalista partisipa ezame nasinál hosi Ensinu Báziku Sentrál (EBC, sigla portugés) 2.077, Ensinu Sekundáriu Jerál (ESG, sigla portugés) 1.445 no Ensinu Tékniku Vokasionál (ETV) totál estudante hamutuk na’in-61.
“Nune’e, iha loron 10 dezembru ne’e, ami sei ba Díli foti pontu ezame nasionál nian, hodi prepara ba ezame nasinál ne’ebé sei realiza 13 dezembru ne’e,” nia realsa.
Nia husu estudante finalista ba tinan 2021 prepara-an no estuda hodi pasa ho valór di’akliu ba finalista sekundáriu tanba ezame nasinál sira liu sei kontinua ba universitariu.
Jornalista : Vitorino Lopes da Costa
Editóra : Evaristo Soares Martins
