DILI, 22 novembru 2021 (TATOLI)— Polísia Nasionál Timor-Leste (PNTL) liuhosi Komandu Unidade Polísia Fronteira (UPF), hala’o promosaun diviza ba membru na’in-21 hosi postu Ajente ba Ajente Prinsipál ho baze ba dedikasaun serbisu.
“Ita halo promosaun diviza ba membru nain-21, kompostu hosi feto na’in-rua no mane 19 hosi postu Ajente ba Ajente Prinsipál. Promosaun ida ne’e pur antiguidade tuir estatutu PNTL, ne’ebé haree hosi sira nia dedikasaun no loyalidade,” Komandante UPF, Superintendente Polísia Euclides Belo, hateten ba Agência TATOLI, iha Hotel Luz Clarita-Audian, segunda ne’e.
Komadante UPF ne’e, informa, membru nain-21 hetan promosaun ne’e livre hosi kazu no promosaun ne’e nu’udar pasu importante ida atu rekoñese membru sira-nian dedikasaun ne’ebé presta ona durante tinan-barak hodi motiva sai profisionál iha kualkér atuasaun.
“Membru hirak ne’e maioria tama iha polísia iha tinan 2015, ne’ebé prenxe ona prenstasaun serbisu, no sira la komete kazu ruma, durante ne’e sira halo halo servisu tuir orientsaun no hatudu loyalidade, nune’e tempu ona atu Komandu UFP halo promosaun ba sira,” nia akresenta..
Membru PNTL nain-21 ne’ebé hetan promosaun ba Ajente Prinsipál maioria koloka iha postu UFP nian hodi asegura liután fronteira entre Timor-Leste no Indonézia hodi prevene no kombate atividade ilegál.
Notisia Relevante: UPF hahú reforsa patrollamentu iha liña fronteira
Jornalista : Natalino Costa
Editór : Florencio Miranda Ximenes
