VIQUEQUE, 22 novembru 2021 (TATOLI) – Postu Adminsitrativu Uatucarbau, munisípiu Viqueque, realiza desportu komunidade hodi komemora loron Proklamasaun Independénsia 28 Novembru ba dala-46.
“Komemora 28 Novenbru nian, ami realiza ona desportu komunitária iha postu Uatucarbau. Jogu abertura ami halo iha semana kotuk agora ba semana ida ona,” Prezidente Komisaun Organizadora atuál Adiministradór Postu Administrativu Uatucarbau, Alfredo dos Santos, informa ba Agência Tatoli liuhosi telefónika, segunda ne’e.
Adiministradór postu ne’e hatutan, desportu komunitária ne’e kompostu hosi futeból, voleiból no atletizmu. Modalidade futeból totál husi suku neen ne’ebé grupu hamutuk 24 no voleiból hamutuk 14. Iha modalidade voleiból kada suku ida iha ekipa feto no mane.
Prémiu ba manán na’in husi futeból no voleiból ho valór orsamentu hanesan: primeiru lugár ho montante $400, segundu lugár $ 300 no terseiru lugár $ 250. Purtantu prémiu ba atletizmu primeiru lugár $ 200, segundu lugár $150 no terseiru lugár $100. Tuir planu, jogu futeból sei termina iha loron 7 dezembru.
Entretantu, montante orsamentu ne’e apoia hosi Sekretaria Estadu Juventude no Desportu (SEJD) ba realizasaun desportu iha Uatucarbau hamutuk $ 5,434.00.
Jornalista : Vitorino Lopes da Costa
Editóra : Evaristo Martins
