DILI, 23 novembru 2021 (TATOLI)—Vise-Sekretáriu Jerál, Konfederasaun Sindikatu Timor-Leste (KSTL), Antonio da Costa Martins, informa iha fulan marsu to’o outubru tinan ne’e KSTL rejista kazu hamutuk–10.
Nia hateten, hafoin KSTL halo lansamentu ba poster inisiativa labele tauk atu ko’alia sai no halo kampaña iha nível kompañia sira hotu iha setor hitu ne’ebé iha, traballadór sira hahú brani atu ko’alia sai informasaun hotu–hotu liga ho violasaun ruma ne’ebé akontese ba sira iha servisu fatin ka iha uma.
“Hahú lansamentu ita halo iha fevereiru, marsu mai to’o outubru, ita hahú simu ona kazu 10 hosi ita–nia membru sira iha kompañia hotelaria, konstrusaun no hospitalidade,” Antonio da Costa Martins, hateten ba Agênsia Tatoli, iha Novu Turismu, Dili, ohin.
Hosi kazu 10 ne’e ho nia tipu hanesan rua ho katégoria violasaun seksuál no ualu hosi violasaun asediu no violénsia domestika ne’ebé akontese iha uma no fó impaktu mai to’o servisu fatin.
Entaun, hosi kazu ne’e nia impaktu mak bainhira sira sofre ona violasaun, automátikamente sira–nia konsentrasaun ba servisu ne’e menus. Tanba ne’e, sira ba aprezenta kazu ne’e ba iha KSTL atu bele hetan nia prosesu refere tuir prosesu justisa formál.
“Bainhira ita simu kazu ne’e, ita refere kedas sira ba iha ALFELA atu nia prosesu justisa formál ne’e tenke la’o no hetan akompañamentu masimu hosi parte juridiku mak ALFELA no KSTL akompanha kazu ne’e to’o ramata,” nia dehan.
Maske nune’e, kazu ne’e agora iha prosesu trata no kompleta dokumentu atu prosesu ne’e bele kontinua ba iha Ministériu Públiku.
“Hosi traballadór iha kompañia no balun hanesan membru traballadór ne’ebé hetan violasaun iha uma, hafoin ne’e nia mai aprezenta ba iha KSTL hanesan membru,” nia informa.
Jornalista : Nelia Fernandes
Editór : Cancio Ximenes
