DILI, 24 novembru 2021 (TATOLI)— Tuir dadus hahú hosi tinan 2003 to’o 2021, Klínika Bairru-Pité, rejista ema ho moras HIV-SIDA hamutuk 300-resin, no hosi númeru ne’e na’in-69 mak mate.
“Ita rejista pasiente hamutuk 300-resin, hosi númeru ne’e na’in-69 mak mate. Daudaun pasiente 188 mak ativu halo tratamentu saúde no na’in-16-resin la’o lakon tanba la kumpre hala’o tratamentu saúde,’’ Xefe Programa HIV-SIDA iha Klínika Bairru-Pité, Mendizio da Costa Tilman, informa ba jornalista sira iha kna’ar fatin klínika,Birru-Pité, kuarta ne’e.
Notisia relevante: Pasiente HIV-SIDA na’in 1.374 no mate 155
Pasiente hirak ne’e maoiria hosi munisípiu risku ba HIV-SIDA hanesan Dili, Liquiça, Ermera, Covalima no Bobonaro.
Xefe Programa HIV-SIDA ne’e, esplika virus HIV-SIDA laiha medikamentu ka aimoruk atu kura, maibé aimoruk ne’ebé mak atu lori sira moris mak antiretroviral therapy (ART).
“Ita halo terapia de’it ho antiretroviral therapy (ART), entaun pasiente sira tenke hemu loro- loron atu asegura pasiente sira nia imunidade. Maibé bainhira ita fó aimoruk la ho loos mak sei hamosu rezisténsia ba sira nia imunidade,” Xefe Programa HIV-SIDA ne’e akresenta.
Nune’e, iha tinan 2020, Klínika Bairru-Pité asina akordu ho Ministériu Saúde atu presta servisu HIV-SIDA nian ba iha kuidadu saúde primária atu fó formasaun ba joven-sira liuliu ba estudante sira iha eskola sekundáriu no universidade hodi hatene kona-ba lalaok moras ne’e.
Entretantu, Komisaun Nasionál Kombate HIV-SIDA Timor-Leste, hahú 2003 to’o fulan-juñu 2021, rejista pasiente HIV-SIDA hamutuk 1.374, no hosi númeru ne’e iha nain 155 mak mate, na’in-656 mak hala’o tratamentu intensivu no restu seidauk hala’o tratamentu tanba hela iha área rurál no dook hosi fasilidade saúde.
Pasiente ne’ebé sofre moras ne’e maioria ho idade, hahú hosi 14 to’o 50. Enkuantu organizasaun nasionál no internasionál bara mak serbisu hamutuk ho Ministériu Saúde hanesan Estrela+ NO Esperansa, hodi hala’o tratamentu no halo akompañamentu ba pasiente na’in-565.
Notisia relevante: Viqueque rejista kazu HIV-SIDA 12, na’in-rua mate
Jornalista : Felicidade Ximenes
Editór : Florencio Miranda Ximenes
