DILI, 24 novembru 2021 (TATOLI)–Ministru Edukasaun Juventude no Desportu (MEJD), Armindo Maia, promete iha tempu badak sei halo pagamentu retroativu ba profesór na’in-54 ne’ebé ministériu nomeia hodi asume kargu diretiva iha estabelesimentu Eskola Tékniku Vokasionál.
“Ha’u promete tinan ne’e nia rohan tenke halo ona pagamentu, maibé presiza halo konfirmasaun uluk kona ba orsamentu ministériu,” Ministru informa iha Palásiu Governu, kuarta ne’e.
Durante ne’e, profesór hirak ne’e simu knaar no responsabilidade másimu iha Eskola Tékniku Vokasionál sira hahú tinan 2017, maibé to’o agora seidauk simu pagamentu retroativu.
“Ha’u hasoru malu ona ho profesór sira iha gabinete no promete molok tinan ne’e ramata, profesór sira bele hetan ona direitu. Daudaun ne’e parte ministériu prosesa ona orsamentu,” nia akresenta.
Notísia relevante: Governu Sei Selu Profesór Retroativu Rejime Espesiál 4.702
Iha sorin seluk, Prezidente Sindikatu Profesór Timor Leste (SPTL), Francisco da Costa Fernandes, haktuir, bainhira hasoru malu ho Ministru Edukasaun, Juventude no Desportu iha semana hirak liubá, halo ona diskusaun kona-ba asuntu ne’e.
“Tinan barak ona sira la hetan valorizasaun, tanba ne’e hakarak aselera prosesu ne’e,” nia tenik.
Nune’e mós, Diretór Eskola Tékniku Vokasionál Ermera, Pedro de Jesus, hateten, bainhira estabelese eskola ne’e, nia parte hetan nomeasaun nu’udar jestór no diretiva, enkuantu despaixu ne’ebé hetan hosi munisípiu, haruka ona ba diresaun maibé nunka manda ba Komisaun Funsaun Públika (KFP).
“Ami hakarak hatene hafoin ami asume kargu nu’udar jestór no diretiva iha estabelesimentu Eskola Tékniku Vokasionál ne’e, ami ninia direitu ba nomeasaun no konsiderasaun hosi Komisaun Funsaun Públika ne’e to’o iha ne’ebé? Tinan haat liu ona, ami mai ezije mak sira foin preokupa no agora preokupasaun ami-nia ne’e hakarak hatene prosesu ne’e to’o ona iha ne’ebé, bele hateten mai ami,” nia tenik.
Antes ne’e, nomeasaun ba kargu diretiva iha tempu ne’ebé la hanesan, balun hahú iha tinan 2018 mai leten no balun hahú tinan 2017, ne’ebé bainhira asume kargu ne’e hetan de’it sirkulár hosi eis Ministra Edukasaun, Juventude no Desportu, Dulce de Jesus, maibé karta formál hosi KFP ba pozisaun laiha to’o agora.
“Karta sirkulár hosi eis Ministra Dulce mak mensiona iha ne’ebá fó fiar mai ami hanesan Diretór Eskola Tékniku Vokasionál atubele halo legalizasaun ba diploma no kaderneta eskolár, maibé ami-nia hakarak ne’e mak tenke iha karta formál hosi KFP hodi reforsa nomeasaun ne’ebé ami asume,” nia informa.
Enkuantu, Ministru Armindo reforsa tan katak nia pozisaun ne’ebé simu, bazeia ba despaixu tinan kotuk no sei válidu hela, ne’ebé ho karta formál sira mak iha kbiit atu hala’o serbisu sira.
Jornalista : Tomé Amado
Editora : Julia Chatarina
