DILI, 24 novembru 2021 (TATOLI)–Ministériu Edukasaun, Juventude no Desportu (MEJD) daudaun ne’e halo verifikasaun dadus profesór voluntáriu hamutuk 1.500 iha territóriu nasionál, maibé iha prosesu nia laran mosu tan dadus foun.
“Ita hanoin verifikasaun bazeia de’it ba dadus tuan ne’ebé iha, maibé realidade to’o iha baze ita simu fali dadus foun, nune’e ita nafatin konsidera maski ita la hatene dadus sira ne’e mai hosi ne’ebé,” Ministru Edukasaun Juventude no desportu, Armindo Maia, relata iha Palásiu Governu, kuarta ne’e.
Notísia relevante: 2021, MEJD rekruta profesór 975
Tuir governante ne’e, prosesu verifikasaun dadus profesór voluntáriu sira kontinua tuir planu ne’ebé iha, nune’e molok tinan ne’e remata MEJD tenke rekolla hotu dadus.
“Ha’u orienta ona ekipa halo verifikasaun dadus sira iha territóriu nasionál, ne’ebé tenke finaliza prosesu molok tinan ne’e ramata,” nia akresenta.
Antes ne’e, MEJD iha ona planu iha tinan ne’e sei rekruta profesór hamutuk 975 hodi hanorin eskola ensinu báziku to’o sekundáriu jerál inklui tékniku vokasionál.
Prosesu rekrutamentu sei fó prioridade ba profesór voluntáriu, kazuál no kontratadu purvolta 5.203, ne’ebé hanorin ona hahú tinan 2013 to’o agora.
Jornalista : Tomé Amado
Editora : Julia Chatarina
