DILI, 24 novembru 2021 (TATOLI)—Sekretáriu Estadu Komunikasaun Sosiál (SEKOMS), Merício Juvinal dos Reis ‘Akara’, kuarta ne’e halo lansamentu ofisiál ba Rádiu Komunidade ba ema ho defisiénsia ho frekuénsia 102,30 MHZ iha Fundasaun Ahisaun, Fatuhada, Dili.
Notísia Relevante: ADTL agradese Governu estabelese rádiu komunidade ba ema ho defisiénsia sira
Sekretáriu Estadu Komunikasaun Sosiál (SEKOMS), Merício Juvinal dos Reis ‘Akara’, hao’o parabéns ba ema ho defisiénsia sira iha Timor laran tomak, tanba rádiu ne’e lansa ba ema defisiénsia sira.
“Parabéns ba ema ho defisiénsia iha Timor laran tomak, rádiu ne’e ba ita-boot sira hotu. Ho rádiu ne’e oinsá ita-boot sira kontinua promove ita-boot sira-nia hanoin, atividade no hatudu ba sidadaun sira seluk. Katak, ita-boot sira mós bele no ita-boot sira mós iha direitu hanesan ho sidadaun sira seluk, hanesan lema ne’ebé mak ita-boot sira iha no nasaun iha katak labele husik ema ida iha kotuk. Konstitusaun mak sai baze ba ita atu halo apoia sira-ne’e. Tanba, ita-boot sira matenek, maske ho defisiénsia fíziku maibé matenek hanesan ho sidadaun sira seluk,” Merício Juvinal dos Reis ‘Akara’ hateten hafoin halo lansamentu ba rádiu komunidade iha Fatuhada, Dili.
Governu kompromete apoiu subsidiu ba rádiu komunidade hotu-hotu iha Timor laran tomak, inklui rádiu komunidade ba ema ho defisiénsia to’o sira bele hamrrik mesak jere rádiu komunidade ho susesu.
“Ha’u kontinua orienta ha’u-nia diretór sira atu akompaña nafatin hosi inísiu to’o ita-boot sira bele rasik. Ha’u husu atu ema lidera no sai jornalista ba rádiu ne’e tenke maluk defisiénsia sira, atu hatudu katak ita-boot sira bele jere rádiu ida-ne’e no bele sai jornalista di’ak hodi bele kompete ho mídia sira seluk. Nune’e, Governu sei kontente liu bainhira estrutura hotu-hotu maluk defisiénte sira mak jere,” nia dehan.
Governante ne’e husu atu ema ho defisiénsia sira uza meiu komunikasaun ne’e ho di’ak no matenek, no uza ho vizaun ne’ebé di’ak atu sira sai líder ida iha futuru tuir sira bele.
“Maluk defisiente sira bele mós sai líder iha ita-nia rain tuir ne’ebé sira bele. Entaun, rádiu ida ne’e atu promove futuru lideransa maluk defisiénsia sira-nian. Hosi ne’e labele promove ita-boot sira-nia an de’it, maibé tenke fó mós informasaun loos no kredivel ba komunidade, liu-liu komunidade ne’ebé hela besik iha área ne’e. Tanba rádiu ne’e komunidade no ita-boot sira mak jere, entaun tenke atinje ita-boot nia komunidade ne’ebé hela besik iha ne’e,” nia dehan.
Prezidente Konsellu Rádiu Komunidade ba Ema ho Defisiénsia, Gaspar Afonso, sente kontente no agradese ba Governu liuhosi Sekretáriu Estadu Komunikasaun Sosiál, Merício dos Reis “AKARA” ne’ebé ho kompromisiu entrega rádiu komunidade ba ema ho defisiénsia no Autoridade Nasionál Komunikasaun (ANC-sigla portugés), ne’ebé aselera tebes frekuénsia ne’e, nune’e ema ho defisiénsia nia lian bele uza meiu oioin atu atinje ema ho defisiénsia nia direitu ne’ebé konsagra ona iha Konstituisaun RDTL artigu 21 no 16.
Tanba ne’e, nia husu ba komunidade liu-liu ho maluk defisiénsia sira iha Dili no iha munisípiu 12 inklui Rejiaun Administrativa Espesiál Oé-Cusse Ambeno (RAEOA) bele sintuniza no bele hatene katak ema defisiénsia agora iha rádiu.
“Ita-nia luta ne’e prosesu naruk ida no ita mós uza meiu oioin atu atinje interese ba ema ho defisiénsia iha rai ida-ne’e,” nia dehan.
Nia ho nia estrutura tomak (prezidene, vise-prezidente, sekretáriu, tezoureira, reprezenta feto no labarik ho defisiénsia) sei tuur hamutuk hodi konsulta ho membru organizasaun defisiénsia sira, nune’e sira bele kompilla hamutuk planu ne’ebé sira atu trasa ba rádiu ida-ne’e funsioná hosi oin ba oin.
”Ha’u husu ba maluk defisiénsia sira rádiu ne’e ita-nian. Hahú prepara ita-nia an atu iha rekursu ida-ne’ebé di’ak, atu nune’e bele jere ita-nia rádiu. Ha’u fiar katak ita-nia rádiu ne’e sei la mate. Naran katak ita rasik iha vontade no kompromisu atu ita bele lori rádiu ne’e bele nakloke no habeler informasaun ne’ebé kredivel no loos ba públiku,” nia dehan.
Tuir planu, rádiu komunidade ba ema ho defisiénsia ne’e sei koloka ema na’in-neen kompostu hosi ema defisiénsia no ema lahó defisiénsia, tanba ho intensaun hakarak promove inkluzivu.
Jornalista : Nelia Fernandes
Editór : Cancio Ximenes
