DILI, 25 novembru 2021 (TATOLI)—Abitante sira ne’ebé hela iha área risku Fomentu II Mota Comoro prinxe ona formuláriu okupante bairru foun ne’ebé Governu planeia ona atu kria.
“Ami koopera ho Governu atu sai hosi fatin ne’e bainhira kria ona bairru foun, tanba momentu akontese inundasaun iha loron 04 abríl liubá, líder komunitáriu mai fahe formuláriu ba ami hodi prinxe atu tama hotu bairru foun. Ami rekoñese fatin ne’ebé ami hela risku tebes, maibé ami hela tanba situasaun uma-laran mak obriga hodi buka moris, nune’e oan sira bele eskola,” Abitante área risku Fomento II, Evalai, hateten ba Agência TATOLI, iha ninia rezidénsia, kinta ne’e.
Notísia relevante: SETP hahú identifika fatin harii bairru foun ba afetadu inundasaun
Antes ne’e, Evalai hamutuk ho ninia família hela iha munisípiu Liquiçá, maibé tanba kondisaun ekonomia, família deside hela iha mota ninin Fomento II.
“Ha’u hela iha ne’e tinan-sanulu ona no rai ne’ebé ha’u hela, maski iha mota-laran maibé ha’u sosa,” nia akresenta.
Nune’e mós, Abitante iha área hanesan, Ermenegilda do Santos, hateten, maski nu’udar vítima dezastre naturál maibé to’o agora seidauk hetan apoiu
“Ami sente triste no tauk, karik akontese udan boot hanesan fulan hirak liubá, tanba hafoin inundasaun iha loron 04 abríl ne’e ami la hetan apoiu ruma hosi Governu tanba dehan ami mak hela ih área risku,” nia akresenta.
Bainhira Governu haruka sai hosi fatin ne’e, abitante sira prontu koopera maibé presiza prepara fatin foun hodi hela.
“Karik ami sai hosi fatin ne’e, ami husu Governu ajuda apoiu fatin, tanba ami prontu sai hosi fatin ne’e,” Ermenegilda tenik.
Iha sorin seluk, Xefe suku Comoro, postu administrativu Don Aleixo, munisípiu Dili, Eurico da Costa de Jesus, informa, autoridade lokál halo ona esplikasaun ba komunidade ne’ebé hela iha área risku.
“Ha’u labele hasai sira tanba bainhira sai Governu tenke kria kondisaun. Tanba tuir orientasaun Governu, ami tun baze halo levantamentu vítima inundasaun no haruka ba Ministériu Administrasaun Estatál (MAE). Tuir planu, komunidade ne’ebé kontinu hela iha Dili, Governu sei kria kondisaun ba sira, ne’ebé levantamentu dadus halo ona no prosesu verifikasaun laiha fallansu tanba abitante hotu sei hetan nia direitu hela iha bairru foun,” nia hateten.
Eurico da Costa afirma nu’udar líder komunitáriu, esforsu ne’ebé daudaun halo mak kontinua sosializa ho orientasaun Governu katak komunidade labele kontinua hela iha fatin risku hanesan mota laran ka ninin.
“Komunidade ne’ebé daudaun ne’e okupa fatin iha área mota Comoro, hanesan natureza nia dalan, la’os ema-nia dalan, maibé karik komunidade mai ikus dehan sosa rai mak hela, entaun sira ho sira mak fa’an ba malu tanba rai ne’e laiha rai privadu no Governu, maibé mota nia dalan,” Autoridade lokál subliña.
Ba kestaun ne’e, Governu liuhosi Sekretaria Estadu Terra no Propriedade (SETP) hahú identifika fatin atu harii bairru foun ba abitante afetadu dezastre naturál.
Tuir dadus ikus, hatudu katak família afetadu inundasaun iha loron 04 abríl hamutuk 33.835 iha territóriu tomak, família hamutuk 7.246 mak desloka ba sentru akollimentu 31 no rejista ema mate hamutuk 44.
Dadus ikus hosi MAE, relata katak família hamutuk 2.558 maka daudaun hela iha área risku dezastre naturál iha munisípiu Dili, hanesan besik mota, foho-lolon no lagoa ninin.
Jornalista : Arminda Fonseca
Editora : Julia Chatarina
