BAUCAU, 25 novembru 2021 (TATOLI) – Prezidente Autoridade Munisípiu (PAM), Olívio ‘Bou-Lesa’ Freitas, hateten feto Timór-oan sira tenke firme hatudu kapasidade iha kualkér desizaun nune’e serbí nasaun.
Bou lesa esplika, governu liuhosi Sekretaria Estadu Igualdade no Inkluzaun (SEII) kontinua promove feto sira hanesan mós tempu luta nian defende emantisipasaun feto atu liberta hosi sosiedade.
Nune’e, agora daudaun feto hahú liberta aan ona tanba hatene dezenvolve aan alende te’in, suku maibé hatene mós serbí iha admistrasaun no utiliza fasilidade komputadór.
“Ha’u motiva ba ita-boot sira (feto) atu firme, la’os haree ba jéneru maibé tenke bazea ba kapasidade, bainhira feto bele, ita tenke aseita . La’ós feto labele, ita haree saida mak nia halo no ko’alia,” Prezidente Autoridade Munisípiu Baucau ko’alia iha serimónia graduasaun Sentru Treinamentu Intergradu no Dezenvolvimentu (CTID, sigla Portugés) Canosa, Vila Antiga, kinta ne’e.
Bou lesa akresenta, feto tenke barani hateten no iha konsiente katak labele esplora beibeik feto la vale, saida mak mane halo, feto bele inklui ekonomia família nian.
“Liuhosi formasaun, forma ita atu sai ema nune’e barani ko’alia iha mane nia oin katak ha’u mós bele, la’ós depende ba mane maibé mesak mós bele, liuhosi formasaun sira-ne’e hakbiit aan atubele foti mós desizaun iha uma laran,” Bou Lesa akresenta.
Prezidente autoridade haksolok ho CTID Canosiana tanba ajuda forma ona feto sira-ne’ebé kualidade no bele responsáblidade ba aan rasik, família no futuru bele serbí komunidade Baucau no Timor-Leste.
“Espera katak ita-boot sira bele sai feto futuru, ne’ebé bele liga ho desizaun iha nível aldeia, munisípiu to’o nasionál,” Bou Lesa argumenta.
Tuir dadus, taxa partisipasaun forsa traballu feto entre idade 15 ba leten ho pursentu 25 no mane kontribui 52.6% ne’ebé indika katak 75% feto sira la envolve iha kampu traballu nian.
Enkuantu envolvementu feto iha kargu governu Timor-Leste kontribui de’it 13% no rezultadu eleisaun suku iha tinan 2016, Timor-Leste kontribui 21 xefe suku feto (4.6%) hosi totál suku hamutuk 452.
Jornalista : Natalino Belo
Editór : Evaristo Soares Martins
