DILI, 25 novembru 2021 (TATOLI)— Governu Indonézia liuhosi Embaixadór iha Timor-Leste oferese ró ambulánsia ida ba Ministériu Saúde atu fasilita evakua pasiente-sira hosi postu Atauro no Rejiaun Administrativu Espesiál Oé-cusse no Ambeno (RAEOA) mai halo tratamentu saúde iha Hospitál Nasionál Guido Valadares (HNGV).
Reprezentante Embaixador Indonézia iha Timor-Leste, Alamsyah, hateten ró ambulánsia ne’e sosa ho $200.000 hosi PT.Fiberboat Indonézia no transporta to’o mai Timor-Leste.
“Ró mai husi Surabaya, Java Leste to’o iha Timor Leste tanba hetan apoia makas hosi PT. fiberbot Indonézia, ne’ebé koko mós nia velosidade atu ajuda Governu Timór-Leste hodi transporta pasiente sira hosi Autauro no RAEOA mai iha HNGV,” Reprezentante Embaixadór Indonézia ne’e, hateten iha Portu Dili, kinta ne’e.
Notísia Relevante: Indonézia apoia nesesidade bázika ba vítima dezastre naturál
Ho apoia ne’e, nia espera bele fó benefisiu ba povu Timor-Leste hodi halo trasporta pasiente sira halo tratamentu saúde ho lais.
Iha biban hanesan, Diretór Nasionál Servisu Ambulánsia Emerjénsia no Médiku (DNSAEM), Horacio Sarmento, agradese ba Governu Indonézia ne’ebé apoia ró ambulánsia ba Timor-Leste atu fasilita transporta pasiente sira hala’o tratamentu intesivu.
“Ami agradese tanba ró ne’e bele apoiu Ministériu Saúde liuliu atu evakua ho lais sidadaun ne’ebé moras iha Atauro no RAEOA mai halo tratamentu intensivu iha HNGV,’’ Diretór Nasionál ne’e agradese.
Ró ambulánsia ne’ebé oferese husi Governu Indonézia ba Minsitériu Saúde ho kapasidade tula pasiente na’in-25 ho velosidade ne’ebé lais liu.
Nune’e, nia dehan, ró ne’e fasilita tebes Ministériu Saúde tanba durante ne’e laiha transporte marítima atu evakua pasiente sira.
“Ita durante ne’e halo kooperasaun ho aviaun ambulánsia MAF, maibé aviaun mós halo operasaun iha loron de’it tanba kalan labele responde. Nune’e ho apoia ida ne’e fasilita tebes ita,” nia akresenta.
Notísia Relevante: TDD halo alterasaun jurídika ba kazu ró ambulánsia
Jornalista : Felicidade Ximenes
Editór : Florencio Mirada Ximenes
