DILI, 25 novembru 2021 (TATOLI)– Treinadór prinsipál klube primeira divizaun, AS Ponta Leste, Francisco de Araújo, informa, prontu kompete iha jogu kontra Lalenok United iha jogu Liga Futeból Timor-Leste ne’ebé hala’o, sesta (26/11), tuku 16:00, lokraik, iha Estádiu Munisipál Dili.
“Ami preparadu ona atu joga hasoru Lalenok, maski sira ekipa forte, maibé ami prontu hasoru sira. Iha ha’u nian kareira treinadór ne’ebé, iha tinan kotuk kaer Assalam FC kontra ona Lalenok la konsege manán. Ha’u agora kaer Ponta Leste hasoru sira (Lalenok) ami sei esforsu atu manán,” Treinadór As Ponta Leste ne’e hateten ba jornalista-sira iha edífisiu LFTL Dili, kinta ne’e.
Lalenok United hanesan ekipa forte no kampiaun dala-rua tutuir malu iha tasa 12 Novembru no LFTL époka 2019-2020.
Francisco de Araújo dehan, nuudar treinadór sei aplika estratéjia atu aproveita frakeza balun hosi Lalenok atu manán-sira hodi hadau pontu tolu, atubele asegura Ponta Leste iha zona aman iha tabela klasifikasaun.
Iha biban hanesan, Treinadór Lalenok United, Gaspar Amaral, konsidera Ponta Leste hanesan mós ekipa ne’ebé forte iha primeira divizaun tanba maioria jogadór hosi selesaun nasionál U-19.
“Ami konsidera Ponta Leste mós ekipa ne’ebé forte, maibé ita hein jogu minutu 90 mak sei determina no fó rezultadu,” dehan Gaspar.
Nia dehan, maski Ponte Leste ekipa forte, maibé jogu ne’e importante ba Lalenok atu manán sira hodi save pontu tolu.
“Ami mak sei manán hodi aumenta ami nia pontu iha tabela klasifikasaun,” nia garante.
Jornalista : Hortencio Sanchez
Editór : Florencio Miranda Ximenes
