BAUCAU, 27 novembru 2021 (TATOLI)—Administradór Dioseze Baucau, Pe. Alípio Pinto Gusmão husu lider sira saran-an hanesan éroi no martires da pátria sira saran an ba mate tanba Timor-Leste nia ukun rasik-an.
Nai Lulik ne’e konvida líder sira tantu nasionál to’o nível munisípiu no lokál sira atu reflete liuhosi misa aniversáriu proklamasaun independénsia ba dala-46 liu-liu leitura sira Maromak nia futar liafuan.
“Babain ita servisu dalaruma nakonu ho sasukat hodi sukat vantajen no desvantajen ba ita, depois ita halo maibé saran an ba ema seluk hanesan Jesus Kristu tenke mate iha krús atu ema seluk moris. Fó ita-nia aan atu ema seluk moris no eroi da patria sira halo ida-ne’e. Saran an atu ita bele moris. Ohin loron, presiza nafatin espíritu ida saran ita-nia an atu ema seluk bele moris, atu ita-nia rain bele sai di’ak,” Padre Alípio hateten iha ninia ómilia iha Igreja Katedral Dioseze Baucau Villa Antiga, sábadu ne’e.
Padre Alípio konvida líder sira atu hotu-hotu reflete, hanesan primeira leitura Maromak haruka Moisés dehan ba Arão no nia-oan sira atu fó bensaun Israel-oan sira.
Buat ida bensaun ne’e temi iha primeira leitura iha oin tolu mak hanesan Maromak hatudu nia oin mamar ba ó, Maromak hatudu nia laran luak ba ó no Maromak hadame ba ó.
Maluk veteranu sira koko esperiénsia iha momentu sira defisil dalaruma sente katak Maromak oin buis, fila kotuk no la hatadu oin mamar ba ema hotu, ne’e kuandu iha momentu sira defisil nia laran Maromak nunka aujensia no nafatin prezensa to’o ikus Maromak hatudu nia oin mamar.
“Eukaristia ne’e rasik signifika asaun ba grasa, hasa’e agradese tanba simu bensaun kona-ba Maromak hatudu oin mamar, laran luak bainhira ita sente laiha kbiit, Maromak Nia grasa mai no Maromak fó dame ba ita,” Padre Alípio akresenta.
Refelesaun seluk mak hosi evanjellu ne’ebé koloka iha kontestu despedida nian bainhira Jesus husik nia eskolante sira molok atu mate, Jesus dehan, ‘’Nu’udar Aman hadomi ha’u, nune’e mós ha’u hadomi imi, imi mós sei hadomi malu nu’udar ha’u hadomi imi’.
“Xave atu ita bele harii ita-nia sosiedade mai hosi liafuan ida-ne’e, imi hadomi malu. Iha segunda leitura dehan Kristu hadomi ema to’o saran an ba Maromak tan nia ema, no iha evanjellu mós dehan ida-ne’ebé saran nia Domin tan nia belun sira,” nia hateten.
“Fo ita-nia an atu ema seluk bele moris no ida-ne’e hahú hosi líder sira hotu hosi Nasionál to’o suku, aldeia no parte uma kreda nian buat ida saran ita-nia an,” Padre Alípio argumenta.
Reflesan ikus liu mak perdua malu tanba Maromak perdua ema tan Kristu, se laiha perdaun ne’e domin laiha. Tanba, daudaun ne’e ema moris iha momentu ne’ebé tuir loloos di’ak ona duké tempu veteranu iha tempu luta nian, nune’e koko no hadomi malu kuandu ema bele pardua malu.
Partisipa iha misa agradesimentu 28 novembru ba dala-46 ne’e mak hanesan Prezidente Repúblika Francisco Guterres Lú Olo, Prezidente Parlamentu Nasionál Aniceto Guterres, Prezidente Tribunál Rekursu Deolindo dos Santos, Vise-Xefe Estadu Maiór Jenerál F-FDTL Majór Jenerál Falur Rate Laek, membru Governu sira, Deputadu V lejislativa, líder komunitária no sarani sira.
Entertantu, partisipante hotu hamutuk ho sarani sira, hafoin misa ramata deretamente ba Osoáriu Fatumaca hodi kari aifunan ba eroi sira nu’udar agradesimentu ba luta independénsia Timor-Leste nian.
Jornalista : Natalino Belo
Editór : Cancio Ximenes
