VIQUEQUE, 27 novembru 2021 (TATOLI)—Munisípiu Viqueque realiza misa agradesimentu loron Proklamasaun Independénsia ba dala-46, ne’ebé konsidera hanesan loron importante ba povu Timor-Leste tomak.
“Ita komemora loron istória 28 novembru ne’ebé importante tebes, tanba hosi loron ne’e mak lori ita hetan independénsia, maluk sira luta naruk no barak lakon vida maka foin harii nasaun ida-ne’e,” Amu Vigáriu Viqueque, Tiago da Costa, hateten iha igreja Viqueque, sábadu ne’e.
Tuir Amu selebrante ne’e, Timor-Leste hetan ona independénsia, tanba ne’e atu lori nasaun ba oin, timor-oan hotu tenke kontribui.
“Luta ba independénsia maibé nafatin luta ba pobreza, luta ba unidade nasionál no patriotizmu ita presiza nafatin kuda iha ita-nia rain doben Timór. Ho selebrasaun ne’e, ita reza hodi husu atu ita-nia nasaun no povu nafatin iha páz nian laran,” nia hato’o.
Hafoin misa agradesementu ne’e ramata, Administradór Viqueque, Januário Soares ‘Bolly’ agradese ba amu selebrante ne’ebé prezide ona misa no atividade ba selebrasaun 28 novembru iha munisípiu Viqueque, ne’ebé komemora iha postu lima.
Misa ne’e partisipa hosi hosi funsionáriu administrasaun munisipál, estudante no komunidade lokál no entidade relevante.
Jornalista : Vitorino Lopes da Costa
Editora : Julia Chatarina
