BAUCAU, 27 novembru 2021 (TATOLI)—Veteranu rejiaun II, Munisípiu Baucau, Amaro Freitas “Lacy-Kati” husu ba Governu atu prezerva fatin subar-fatin Vise komadante FALINTIL, David Alex “Daitula” iha aldeia Woratiti, suku Caibada,Munisípiu Baucau hodi valoriza saudozu nia luta ba ukun rasik an.
“Ha’u husu Governu atu hadi’a tanba Komadante David Alex Daitula nia subar-fatin no lakon iha ne’e, nune’e tenke preserva hodi fó memoria ba jerasaun foun sira,” Veteranu Rejiaun II, hateten ba Agência TATOLI iha ámbitu iha komemorasaun loron 28 novembru no halo reflesaun ba fatin kapturasaun saudozu Daitula iha aldeia Woraiteti, munisípiu Baucau, sábadu ne’e.
Governu presiza hadi’a subar-fatin Komandante Daitula nian hanesan uma mahon ba veteranu sira iha munísipiu Baucau hodi kada tinan bele halo reflesaun ba loron istóriku ne’e.
Iha biban hanesan, Veteranu Costodio Belo ‘Alin Laek’ husu mós ba Governu atu prezerva subar-fatin komandante Daitula atu sai fatin turizmu istóriku.
“Durante ne’e, subar-fatin Komadante Alex Daitula ema la hatene ida, tanba ne’e Governu presiza transforma sai fatin turizmu istóriku hodi jerasaun foun bele hatene,” Veteranu ne’e rekomenda.
Tanba, Veteranu Alin Laek afirma hosi fatin ne’e mak militár Indonézia kaptura saoudozu Komandante Daitula lakon no mate.
Hatan ba kestaun ne’e, Sekretaria Estadu Antigu Kombatente Libertasaun Nasionál, Gil da Costa ‘Oan Soro’, hateten, simu ona proposta hosi veteanu munisípiu Bauca hodi prezervasaun subar-fatin Saudozu Komandante Daitula.
“Ita nia veteranu haruka ona proposta ba atu halo preservasun ba subar-fatin, maibé seidauk iha osan. Nune’e ha’u lakohi halo kompromisiu bainhira maka atu hahú ida ne’e,” nia afirma.
Biban ne’e, Primeiru Ministru, Taur Matan Ruak akompaña hosi Xefe Estadu Maiór Jenerál FALINTIL Forsa Defeza Timor-Leste (F-FDTL), Tenente Jenerál Lere Anan Timur no veteranu munisÍpiu Baucau vizita subar-fatin Vise Xefe Estadu Maiór FALINTIL, David Alex Daitula.
Presiza hadi’a estrada ba subar-fatin Saudozu Daitula
Xefe Suku Caibada, postu administrativu Baucau, Jose Agapito Soares, rekomenda ba Governu liuhosi Ministériu Obra Públiku atu hadia estrada ba subar-fatin Daitula.
“Ha’u sujere ba Governu hadi’a estrada ba subar-fatin ka fatin ne’ebé militár Indonézia ka’er ita-nia saudozu tanba fatin ne’e importante ba jerasaun foun sira atubele relembra,” Autoridade ne’e sujere.
Tanba, kondisaun estrada ne’e mós afeta tebes ba komunidade sira iha area ne’e lori produtu lokál ba merkaduria.
“Ami husu Governu atu hadi’a estrada atubele fasilita komunidade sira,” nia akresenta.
Notísia Relevante: Administradór Dioseze Baucau husu líder sira saran-an hanesan éroi sira
Jornalista : Felicidade Ximenes/Natalino Costa
Editór : Florencio Miranda Ximenes
