iklan

EDUKASAUN, HEADLINE, MUNISÍPIU, VIQUEQUE

Eskola 04 setembru Viqueque aprezenta produtu resiklajen iha komemorasaun Proklamasaun Independénsia

Eskola 04 setembru Viqueque aprezenta produtu resiklajen iha komemorasaun Proklamasaun Independénsia

Ministru Asuntu Parlamentu no Komunikasaun Sosiál (MAPKOMS), Francisco Martins da Costa Pereira Jerónimo, vizita no observa produtu resiklajen hosi estudante sekundáriu sira iha feira, iha kampu demokrasia, Boromatan, Viqueque villa, domingu (28/11). Imajen TATOLI/Vitorino Lopes da Costa

VIQUEQUE, 28 novembru 2021 (TATOLI)—Estudante Sekundáriu 04 setembru Viqueque aprezenta produtu kreativu hosi rezultadu resiklajen, iha ámbitu komemorasaun Loron Proklamasaun Independénsia ba dala-46.

“Ohin profesór hamutuk ho estudante hosi departamentu siénsia teknolojia, hanesan iha grupu siénsia, aprezenta produtu sira ne’ebé estudante prodúz liuhosi prátika,” Profesór Sekundáriu 04 setembru Viqueque, Helio Faria Guterres, hateten, ba Agência TATOLI, iha kampu demokrasia, Boromatan, Viqueque villa, domingu ne’e.

Objetivu aprezentasaun ne’e atu kontribui ba loron nasionál, nune’e estudante sira bele oferese produtu.

“Matéria prátika ne’ebé aprezenta hanesan mákina dulas hare kulit, makina dulas kafé no seluk tan. Materiál prátika mai hosi lixu doméstika, ne’ebé ami transforma sai siénsia ida hodi eduka ita-nia estudante sira no hatudu ba komunidade sira saida maka ami bele, nune’e estudante sira implementa iha moris loron-loron,” nia akresenta.

Notísia relevante: MAPKOMS enkoraja Viqueque-oan fó liman ba malu hanoin dezenvolvimentu

Tuir Profesór, estudante iha eskola ne’e kreativu no bainhira estudante sira hato’o hanoin ba profesór sira, sempre akompaña nune’e bele hetan rezultadu di’ak.

“Durante tinan-haat nian laran, profesór hamutuk ho estudante sira iha grupu Liseu Since Club, fó vantajen ba estudante sekundáriu atu hatudu talentu durante prátika,” nia tenik.

Iha aprezentasaun produtu ne’e, Ministru Asuntu Parlamentu no Komunikasaun Sosiál (MAPKOMS), Francisco Martins da Costa Pereira Jerónimo, husu ba estudante sira atu nafatin hasa’e koñesimentu iha teknolojia, nune’e estudante bele koñese di’ak liután prosesu produsaun hanesan indústria.

“Ha’u husu ba imi (estudante) nafatin hadi’a kualidade hodi mellora liután imi-nia koñesimentu,” Ministru ne’e enkoraja.

Iha biban ne’e, Estudante 04 setembru, siénsia no teknolojia klase 3, Adriana Maida, hateten, produtu resiklajen sira mai hosi inisiativa estudante.

“Produtu ne’ebé hatudu la’ós para iha ne’e, maibé ami nafatin esforsu aprende halo di’ak liután iha futuru. Materiál ne’ebé ami uza prodúz hosi mákina dulas hare hanesan tripleks a’at, bor, kalen a’at, ne’ebé ami tau hamutuk hodi prodúz sasán,” Adriana Maida esplika.

Tuir estudante ne’e, sira hetan abilidade prodúz produtu liuhosi profesór sira no hosi kanál Youtube, nune’e sira halo prátika.

Jornalista : Vitorino Lopes da Costa

Editora     : Julia Chatarina

iklan
iklan

Leave a Reply

iklan
error: Content is protected !!