DILI, 28 novembru 2021 (TATOLI)—Estudante finalista hosi Institute of Business (IOB) hamutuk 480 hosi fakuldade tolu no programa mestradu ida sei partisipa seremónia gradusaun, ne’ebé sei realiza iha loron 29 no 30 novembru.
Tuir Vise-Reitór IOB, António Soares Martins, seremónia ne’e fiksu ona tanba Ministériu Ensinu Superiór Siénsia no Kultura (MESSK) verifika ona lista graduadu no naran estudante sira públika ona iha Jornál Repúblika.
“Estudante na’in-480 ne’e ita sei fahe ba rua, segunda ita gradua uluk estudante balun, hafoin iha tersa mak ita gradua tan seluk,” Vise-Reitór IOB hateten ba Agência TATOLI, iha kampus IOB, Fomentu, domingu ne’e.
Notísia relavante: Universidade tolu submete lista graduasaun 2.101 ba MESSK
Estudante finalista mai hosi Fakuldade Ekonomia, Ospitalidade Turizmu, Informátika (ICT-Information and Communication Technology) inklui programa mestradu pos graduasaun.
Enkuantu, iha loron segunda (29/11) sei fó uluk oportunidade ba Fakuldade Ekonomia, Ospitalidade Turizmu, no programa mestradu pos graduasaun, hafoin iha tersa (30/11) maka ba Fakuldade ICT.
“Totál estudante finalista ne’ebé iha hosi Fakuldade Ekonomia 183, Fakuldade Ospitalidade Turizmu 44, Mestradu tolu no ICT 250,” nia dehan.
Jornalista : Tomé Amado
Editora : Julia Chatarina
