iklan

BOBONARO, HEADLINE, MUNISÍPIU

Governu iha espetativa prinxe ukun-an ho dezenvolvimentu

Governu iha espetativa prinxe ukun-an ho dezenvolvimentu

Ministru Transporte no komunikasaun, José Agostinho da silva. Imajen TATOLI/Sérgio da Cruz

BOBONARO, 28 novembru 2021 (TATOLI)—Ministru Transporte no komunikasaun, José Agostinho da silva, hateten, iha ámbitu prosesu konstrusaun Estadu, Governu iha espetativa prienxe ukun-an ho dezenvolvimentu hodi dignifika no valoriza eroi ne’ebé halo sakrifísiu ba luta  libertasaun nasionál durante tinan-24 nia laran hodi harii nasaun soberanu.

“Ita hotu nia espetativa mak ukun rasik-an ne’e labele husik mamuk, maibé tenke prienxe ho dezenvolvimentu iha orgaun soberanu haat,” Ministru hateten iha fatin komemorasaun loron nasionál, iha kampu futeból, suku lahomea, postu Maliana, munisípiu Bobonaro, domingu ne’e.

Notísia relevante: MTK louva partisipasaun povu Bobonaro iha komemorasaun loron Proklamasaun Independénsia

Governante ne’e ko’alia asuntu ne’e bainhira sai inspetór seremónia komemorasaun loron Proklamasaun Independénsia ba dala-46.

Tuir ezekutivu ne’e, bainhira planu prioridade atu implementa ho di’ak, presiza partisipasaun no kontribuisaun entidade hotu hodi garante páz no establidade iha rai-laran, nune’e bele dudu dezenvolvimentu ba povu nia moris di’ak.

Tanba ne’e, povu hotu iha territóriu laran tomak tenki koopera ho parte seguransa hodi garante situasaun hakmatek, nune’e fó biban ba Governu ezekuta orsamentu ho responsablidade no kualidade tuir lei.

“Dezenbolvimentu atu la’o presiza iha seguransa no establidade nasionál kondusivu, ita labele fahe dezenvolvimentu ho seguransa, tanba buat rua ne’e presiza malu hanesan kafé no masin-midar, entaun parte hotu presiza kontribui ba páz no estabilidade tanba liafuan rua ne’e mak osan mean maski iha implementasaun difisil,” nia akresenta.

Ministru nota mós katak, maski Timor-Leste ukun-an  tinan 20 ona, maibé dezenvolvimentu iha setór hotu seidauk la’o ho di’ak, tamba ne’e VIII Governu Konstituisionál iha polítika desentralizasaun ne’ebé fó kompeténsia ba Autoridade munisipál atu halo jestaun ba dezenvolvimentu rasik.

Nune’e, governante ne’e enkoraja joven sira iha nível munisípiu to’o suku atu apoia no kolabora ho autoridade munisipál sira hodi prepara-an imveste iha setór edukasaun, saúde, agrikultura, turizmu no dezenvolvimentu rekursu umanu, nune’e bele kontribui ba dezenvolve iha ida-idak nia munisípiu.

“Kuandu ita delega ona kompeténsia sira n’e ba munisípiu, funsionáriu públiku sira ne’ebé halo knaar iha nasionál tenki desentraliza, se lae fó espasu ba Autoridade munisipál sira atu rekruta fali funsionáriu foun,” nia dehan.

Jornalista : Sérgio da Cruz

Editora     : Julia Chatarina

iklan
iklan

Leave a Reply

iklan
error: Content is protected !!