Grupu AGFFLB iha Baucau prioritiza empodera feto rurál
BAUCAU, 28 novembru 2021 (TATOLI) – Asosiasaun Grupu Feto Fatuk Laran Baucau (AGFFLB) liderada Juvita Maria Conceicão Oliveira, prioritiza empodera feto rurál iha munisípiu refere.
Prezidente AGFFLB), Juvita Maria Conceicão Oliveira, informa, asosisasaun ne’e fó prioridade liu hodi empodera feto rurál iha munisipiu Baucau oinsá hamosu emprendedorizmu ba sira-nia aan.
“Ami-nia asosiasaun ne’e foka liu ba empoderamentu feto sira iha munisipiu Baucau, oinsá hakbi’it sira-nia koñesimentu hodi hamosu emprendedorizmu ba iha sira-nia aan,” Juvita Maria informa ba Agência TATOLI, iha ezpozisaun ne’ebé halo iha aldeia Darsula, suku Gariuai, postu administrativu Baucau Vila , domingu ne’e.
Prezidente AGFFLB ne’e kontente tanba hetan oportuniade bele partisipa feira iha Darsula, Baucau.
“Ami mai aprezenta ami-nia produtu sira-ne’ebé ami nian membru sira halo, homan, soru tais, hodi fa’an no halo negósiu iha. Membru sira halo negosiu iha área peska nian, hanesan tunu-ikan fresku hodi fa’an, kulinária no vestuária nian,” nia katak.
Nia dehan, durante feira, só kulinaria maka fó rendimentu barakliu kompara ho produtu sira seluk.
“Ami-nia grupu ema na’in-sanulu resin-ida no harii iha tinan ne’e, ami mai partisipa espoizaun ne’e ha’u kontente tanba bele hetan rendimentu kada loron dolar $70 kompara loron bainbain $40 , ami-nia produtu fa’an de’it iha Baucau, seidauk fa’an iha Dili,” nia fó-sai.
Nune’e mos, Isabel da Costa husi grupu Hakbiit ne’ebé hala’o atividade soru-tais sente kontente tanba bele partisipa iha esposizaun ne’ebe Governu halo iha Darsula.
Nia husu atu Governu apoia sira-nia nune’e bele dezemvolve aan di’ak liután future.
Jornalista : Natalino Costa
Editór : Evaristo Soares Martins
