COVALIMA, 28 novembru 2021 (TATOLI)–Komisaun organizadora ámbitu loron Proklamasaun Independénsia ba dala-46, entrega prémiu ba manan-na’in kompetisaun ho modalidade animasaun kulturál, banda múzika, tutur lolo, hadudu-au, dada tali, tebe dai no seluk tan.
“Sira ne’ebé sai vensedór iha kompetisaun ne’e ho nia montante orsamentu la hanesan,” Prezidente Komisaun Organizadora, Francisco de Jesus Alves, informa ba Agência TATOLI, iha ladi camanasa, Covalima, domingu ne’e.
Hosi modalidade hirak ne’e, prémiu ba dada tali mak boot liu, tanba primeiru lugár hetan osan $200 no prémiu kiik liu maka animasaun kulturál.
Orsamentu ne’ebé Administrasaun prevee ba komemorasaun loron nasionál ne’e hamutuk $12.800, ne’ebé aloka ba kada postu administrativu sira hamutuk $4.500.
Orsamentu hirak ne’e kompostu hosi seksaun Sekretáriu $2.786, protokolu no MC $88, liturjia no korru $460, isar bandeira nasionál $1.175,50, parada no formatura $45, lojístika $924,50, mobilizasaun $45, limpeza $216,50, konsumu 1.022,50, dekorasaun $189, primeiru sokorro $81, seguransa $140, desportu $2.230, feira no bazar $500, animasaun kulturál $600, halai kuda $1.892.
Jornalsita : Celestina Teles
Editora : Julia Chatarina
