VIQUEQUE, 28 novembru 2021 (TATOLI)-–Ministru Asuntu Parlamentár no Komunikasaun Sosiál (MAPKOMS), Francisco Martins da Costa Pereira Jerónimo, husu Viqueque-oan sira tenke hamutuk hodi dezenvolve Viqueque.
“Iha ámbitu komemorasaun 28 novembru ne’e, ha’u hakarak hato’o mesanjen ba Viqueque-oan sira tenki hamutuk fó liman ba malu hodi hanoin dezenvolve Viqueque,” Ministru Francisco hateten ba Agência TATOLI, iha ámbitu komemorasaun loron nasionál, iha salaun Administrasaun, domingu ne’e.
Tuir governante ne’e, komemorasaun Loron Proklamasaun Independénsia ba dala-46 ho tema ‘Mai ita hamutuk atu luta hasoru dezenvolvimentu rai ida-ne’e sai di’ak’, atu povu bele moris hakmatek no hetan bem estar.
“Povu mós hakarak kontribui ba dezenvolvimentu nasionál. Entaun povu Viqueque lalika hanoin individuál, husu Viqueque-oan tau hanoin hamutuk saida mak di’ak ba munisípiu ne’e, halo favór kontribui atu dezenvolve-an. Problema individuál tau ba kotuk, tenke hanoin hamutuk ba dezenvolvimentu tanba Viqueque presiza moris iha situasaun di’ak,” nia akresenta.
Jornalista : Vitorino Lopes da Costa
Editora : Julia Chatarina
