DILI, 29 novembru 2021 (TATOLI) – Jerente Sentru Juveníl Federasaun Futeból Timor-Leste (FFTL), Gaspar Quintão, informa, hahú normaliza treinamentu ba juviníl tanba Timor-Leste livre ona hosi Covid-19 no Governu fó biban ona ba ema hotu hala’o atividade livre.
“Agora ami normaliza fali ona treinamentu ba juveníl sira, ami mós orienta ona ba Asosiasaun sira iha Timor-Leste atu re-ativa hikas treinamentu futeból ba labarik-sira, taba durante ne’e ita para totál tanba Covid-19,” Jerente Gaspar Quintão hateten ba Agência TATOLI iha edifísiu FFTL Dili, segunda ne’e.
Daudaun, FFTL rejistu jogadór juveníl hamutuk 200-resin, maibé envolve mós jogadór balun hosi sentru juveníl ne’ebé organiza hosi Sekretariu Estadu Juventude no Desportu (SEJD).
“Kada loron-sira treinu iha kampu FFTL hahú dader no balun loraik, sira ne’ebé eskola dader treinu loraik, sira ne’ebé eskola loraik treinu iha dader. Sira ne’ebé envolve an iha juveníl ho idade 6 to’o 12,” nia dehan.
Tanba, FFTL iha kondisaun no ekipamentu ba labarik sira hodi halo treinamentu sufisiente no laiha difikuldade.
Jornalista : Hortencio Sanchez
Editór : Florencio Miranda Ximenes
