COVALIMA, 29 novembru 2021 (TATOLI)—Xefe Investigasaun PNTL-VPU Covalima, Amélia de Jesus Amaral, hateten hosi fulan-janeiru to’o novembru ne’e Komandu Polísia Munisípiu Covalima liu hosi Unidade ema Vulnerável (PNTL-VPU) rejista kazu hamutuk 64.
Notísia Relevante: Janeiru-setembru, PNTL-VPU Covalima rejista kazu hamutuk 38
“Hahú hosi janeiru to’o ohin loron, PNTL-VPU Covalima rejista kazu hamutuk 64 ho tipu kazu sira la hanesan,” Xefe Investigasaun VPU, Amélia de Jesus Amaral, hateten ba jornalista sira iha salaun CCC, segunda ne’e.
Kazu hirak ne’e mak ho tipu ho tipu hanesan violénsia doméstika mak aas liu iha Covalima, segundu mak abuzu seksuàl ba minoridade no más abandona.
Autór sira-ne’ebé komete iha kazu sira-ne’e, PNTL-VPU halo tiha investigasaun no rekomenda ba Ministériu Públiku hamutuk 63 hodi prosesa ba Tribunál Distritál Suai hodi halo julgamentu.
“Kazu abuzu seksuál foin akontese iha loron hirak liu ba. Ita hotu rona tanba labarik ho tinan ualu (8), agora sei iha ami nia fatin tanba falta nia dokumentu kona-ba atu hato’o informasaun,” nia informa.
Xefe Investigasaun PNTL-VPU Covalima ne’e promete sei aselera lalais kazu ne’e lori ba iha Ministériu Públiku tanba sei kompleta nia dokumentu sira.
Maske durante ne’e entidade hotu halo sensibilizasaun maibé númerú kazu violénsia doméstika kontinua aas, no komunidade mós iha ona kuñesimentu atu hato’o keixa ba PNTL-VPU.
Tanba ne’e, MSSI hamutuk PNTL-VPU sei kontinua realiza sensibilizasaun kona-ba violasaun ba jéneru, nune’e ida-idak bele hateten sira-nia direitu no dever iha família.
“Dala barak feto sira ko’alia direitu maibé sira la komprende direitu ne’ebè sira halo, liu-liu sira-nia direitu, haluha sira-nia dever. Ami sei halo sensibilizasaun ba feto ho mane hatene sira-nia direitu no dever,” nia hatutan.
Dezafiu ne’ebé PNTL-VPU Covalima enfrenta mak menus transporte maibe ne’e la’ós sai barreira ba sira atu hala’o sira-nia knar durante ne’e sosiedade sivil ajuda sira.
Jornalsita : Celestina Teles
Editór : Cancio Ximenes.
