PNTL planu koloka membru asegura eskola-sira atu evita konflitu
DILI, 29 novembru 2021 (TATOLI)—Komandante Polísia Nasionál Timor-Leste (PNTL), Munisípiu Dili, Superintendente Xefe Henrique da Costa, hateten, Komandu PNTL munisípiu Dili planu atu koloka Polísia Ofisiál Eskola (POE) atu fó segurasa hodi evita estudante-sira hamosu konflitu.
“Ami planeia sei koloka Polísia Ofisiál Eskola (OPE) ba iha eskola balun iha Dili laran atu asegura segurasa hodi evita estudante sira labele hamosu koflitu iha eskola,” Superintendente Xefe Polísia ne’e Henrique, hateten ba jornalista sira iha Komandu PNTL munisipiu-Dili, Caicoli, tersa ne’e.
Daudaun, iha ona konfrontu entre estudante sira mosu fali ona iha eskola balun iha Dili no estudante hosi eskola balun komesa provoka malu.
“Iha estudante balun eskola iha Dili laran hanesan iha eskola 4 Setembru Balide iha konfrontu entre estudante sira ne’ebé rezulta profesór ida hetan kanek,” Komandante ne’e akresenta.
Nune’e, Komandante PNTL ne’e husu ba estudante sira atu aproveita oportunidade hodi estuda no tenke hapara violénsia.
“Ita hatene katak eskola fatin ita atu buka matenek, la’os kria fali problema, tanba ne’e mak husu ba alin sira uza ita boot sira nia tempu atu eskola no uza oportudidade ho didi’ak atubele fó buat di’ak iha future,” Henrique fó hanoin.
Jornalista : Natalino Costa
Editór : Florencio Miranda Ximenes
