BAUCAU, 29 novembru 2021 (TATOLI) – Xefe suku Gariuai, postu administrativu Baucau Vila, munisípiu Baucau husu Governu atu aumenta orsamentu ba projetu Programa Nasionál Dezenvolvementu Suku (PNDS) tanba benefísia direita ba povu iha área rurál.
“Kontinua aumenta rekursu finanseiru ba PNDS iha Suku hotu hodi implementa projetu komunitáriu ho eskala ki’ik tamba projetu sira refleta duni ami povu ninia nesesidade,” Xefe suku Gariuai, Arlindo Belo Freitas informa ba Agência TATOLI iha Vila Nova, segunda ne’e.
Liurai Gariuai ne’e husu Governu atu ho seriedade ba monitorizasaun no observasaun nafatin PNDS hodi asegura kualidade infraestrutura, ezekusaun orsamentu hodi alkansa moris di’ak povu tomak liuliu komunidade iha baze.
Nune’e komunidade iha área rúral labele kontinua sai vítima ba dezenvolvimentu ne’ebé lentu maka presiza haboot no fó konfiansa ba PNDS hodi kontinua eziste iha territóriu nasionál.
Durante ne’e, komunidade kontinua reklama kualidade ba vida moris hanesan hakarak oan sira asesu edukasaun ne’ebé kualidade, fasilidade saúde ne’ebé sufisiente, eletrisidade, bee-moos no alimentasaun ne’ebé nutrutivu.
Governu rasik afirma kompromisu ba dezenvolvimentu lokál liuhosiPNDS, hahú 2014 to’o 2021 ne’ebé aloka ona fundu infraestrutura hamutuk $210,990.05 ba suku Gari-uai ho objetivu hodi produz rasik infraestrutura ho eskalaun kiik hanesan PNDS regulár, Uma Kbiit Laek (UKL) no Reabilitasaun Sede Suku (RSS).
“PNDS hanorin ami atu responsável ba rezultadu hosi fundu ne’ebé ami utiliza, asegura manutensaun projetu hodi kontinua funsiona no nafatin oferese benefísiu ba suku ho komunidade,” Arlindo argumenta.
Jornalista : Natalino Belo
Editór : Evaristo Soares Martins
