DILI, 30 novembru 2021 (TATOLI)—Iha ámbitu komemorasaun loron Proklamasaun Independénsia 28 de Novembru ba dala-46 ne’e, Ministériu Turizmu Komérsiu Insústria (MTCI) liuhosi Inspesaun Jerál Jogu oferese mini merkadu ba komunidade Darasula, suku Gariuai, postu administrativu Baucau Vila, munisípiu Baucau.
“Mini merkadu ne’e nu’udar rekordasaun ida hosi loron Proklamasaun 28 Novembru ba komunidade Darasula. Mini merkadu ne’e nu’udar merkadu tradisionál ida atu komunidade bele faan produtu lokál hodi dada kompradór sira atu hakbesik ba merkadu sira iha baze,” refere komunikadu imprensa ne’ebé Agência Tatoli asesu, tersa ne’e.
Inspetór Jerál Jogu Nian, Domingos Guterres, informa mini merkadu ne’e atu lori fila komunidade hodi hala’o atividade negósiu, atu hasa’e kresimentu ekonómiku iha komunidade nia leet.
Prezidente Autoridade Munisípiu Baucau, Olivio Freitas ‘Bou-Lesa’ agradese ba Governu liu-liu Ministériu Turizmu Komérsiu Indústria (MTCI), ne’ebé iha ámbitu komemorasaun loron Proklamasaun Independénsia 28 de Novembru ba dala-46 ne’e bele rai hela rekordasaun di’ak ida ba komunidade Gariuai.
Ministru Turizmu Komérsiu no Indústria, José Lucas do Carmo husu ba komunidade aldeia Darasula, suku Gariuai, postu administrativu Baucau Vila, atu utiliza fatin ne’e ho didi’ak hodi bele hetan netik rendimentu ruma liuhosi sira-nia atividade merkadu diária nian.
“Mini merkadu ne’e harii nu’udar apoiu hosi Kompañia Jogu Lotaria Amizade nian ba MTCI liuhosi Inspesaun Jeral dos Jogus ba komunidade,” nia dehan.
Jornalista : Nélia Ferandes
Editór : Cancio Ximenes
