DILI, 30 novembru 2021 (TATOLI)—Parlamentu Nasionál tersa ne’e liuhosi reuniaun plenária extreaordinária aprova votu pezar ba eis deputadu Álvaro do Nacimento ‘Sesurai’ ho Koronél Infantária Domingos da Costa ‘Domin’.
Votu pesár ne’e ho nia rezultadu votasaun a-favór 47, kontra no abstensaun laiha.
Notísia Relevante: Tanente Koronel Infantaria ‘Domin’ hakotu iis tanba sofre moras komplikadu
“Nune’e, votu pezar rua ne’e aprovadu,” Prezidente Parlamentu Nasionál, Aniceto Longuinhos Guterres Lopes, anunsiu liuhosi plenária, tersa ne’e.
Parlamentu Nasionál inisia votu pezar númeru 31/2021 no númeru 32/2021 ba saudozu na’in-rua hodi manifesta sentidu kondolénsia profundu kle’an ba matebian no família tanba ho sira-nia kontribuisaun ne’ebé fó ona iha luta libertasaun nasionál.
Álbaro do Nacimento ‘Sesuarai’ ho idade (56), moris iha Zumalai, Covalima, loron 06 maiu 1965 no hakotu iis 16 novembru 2021 iha HNGV tanba moras komplikadu.
Kontribuisaun saudozu nian ho idade sei joven bainhira Indonézia invade territóriu, halo servisu apoiu atividade klandestina iha Dili no ligasaun munisípiu sira-ne’eb nunka deziste,. Iha tinan 1989 hetan kapturasaun no torturasaun hodi militár Indonézia, no tinan 2009 saudozu nu’udar deputadu durante tinan ida ho balun hosi bankada Partidu Demokrátiku.
Entretantu Koronel Infantaria, Domingos da Costa ‘Domin’, dedika vida tomak ba libertasaun nasionál, involve atividade klandestina, guerrileira iha luta libertasaun no hahú iha 2001 integra iha Falintil-Forsa Defeza Timor-Leste iha dezenpeña funsaun ho lealdade servi instituisaun.
Votu pezár ne’e aprezenta hosi deputadu proponente Mariano Assanami Sabino, Duarte Nunes, Corneilo Gama ‘L7’, David Dias Ximenes ‘Mandati’, António Verdiál, Jose Agostinho Sequeira ‘Somotxo’.
Deputadu proponente, José Agostinho Sequeira ‘Somotxo’, klarifika votu peza ba númeru 32, Domingos da Costa ‘Domin’, hafoin hakotu iis komandu F-FDTL promove hosi Tanente ba postu Koronél Infantaria.
Ba fali saudozu Álbaro do Nacimento ‘Sesurai’, nu’udar kuadru ida ne’ebé hola parte frente klandestina iha rejiaun kuatru dezde re-organiza ho saudozu Nino Coni Santana iha rejiaun hoksolok sempre iha estrutura re-organizasaun hamrik nu’udar sektretáriu Suai nian to’o funu ramata.
“Kuadru ida iha situasaun iha defisíl espalla rezisténsia ninia servisu iha munisípiu Covalima ne’ebé gerrileiru barak hatene ninia kontribuisaun ba funu, nune’e fó omajen espesiál ba sira na’in-rua,” nia hateten.
Deputadu PD, António da Conceição, hateten ukun rasik an ne’ebe ita foin selebra proklamasaun unilaterál dala-46 iha 28 Novembru, hodi hanoin éroi sira seluk nia luta no ukun rasik an ne’e hetan hikas oportunidade atu fó kontinuasaun sosa duni ho folin karun tebes.
“Ho falesidu Domingos Santos Domin nia istória partisipa iha luta maske ho otas ida sei nurak hola desizaun vizionáriu responsavilidade hakarak atu hamutuk ho FALINTL atu reforsa funu ba ukun rasik-an, nia dehan.
Bandaka PD fó nia hakruuk tanba lakon nia responsavilidade ida, ‘Sesurai’ ne’ebé atu kontinua luta no kontribui ba luta ukun rasik an ninia, ne’ebé asume kargu aas liu iha Partidu Demokrátika nian iha munisípiu Covalima.
PD rekuñese nia kontribuisaun habo’ot partidu iha Covalima iha inisíu tempu ukun rasik an, no bankada PD rekuiñese éroi ho tinan ne’ebé nurak hola ona responsabilidade atu reforsa funu ba ukun rasik-an.
“Isin mak lakon maibé obra sei hakerek nafatin ho letra boot iha livru istória luta libertasaun nasionál. Nune’e, estrutura partidu hato’o sentidu profundu lutu,” Kalohan hateten.
Deputadu PLP, Francisco Vasconcelos, lori bankada PLP nia naran fó hakruuk hodi hatudu sentidu profunda ba dedikasaun saudozu na’in-rua luta ba libertasaun nasionál.
Xefe Bankada CNRT, Duarte Nunes, hato’o sentimentu tristeza ba saudozu na’in-rua ne’ebé fó ona kontribuisaun iha luta.
“Triste tanba ho sira na’in rua ho ida hanesan, ne’ebé sei bele fó tan kontribuisaun iha dezenvolvimentu maibé Maromak nia planu simu realidade ne’e. Nune’e, partidu CNRT hato’o sentidu profundu lutu ba falesimentu ne’e ho família,” nia dehan.
Notísia Relevante: Veteranu “Sesurai” hakotu iis tanba moras komplikadu
Jornalista : Nelson de Sousa
Editór : Cancio Ximenes
