DILI, 01 dezembru 2021 (TATOLI)–Governu liuhosi reuniaun Konsellu Ministru (KM), aprova ho alterasaun Dekretu Governu kona-ba regulamentu internu Komisaun ba Asuntu Tasi ne’ebé aprezenta hosi Ministru Defeza, Filomeno da Paixão de Jesus.
“Kompeténsia Ministériu Defeza bele propoin métodu atu organiza nia-an,” Ministru Prezidénsia Konsellu Ministru, Fidelis Manuel Leite Magalhães, informa, hafoin reuniaun ezekutivu, iha Palásiu Governu, kuarta ne’e.
Notísia relevante: Governu Estabelese Ona Sistema Autoridade Marítima
Projetu Governu ne’e mai hafoin aprovasaun Dekretu-Lei númeru 39/2020 loron 23 setembru, ne’ebé kria Sistema Auditoria Marítima (SAM) no prevee ba Komisaun ba Asuntu Tasi, hanesan órgaun ne’ebé iha kompeténsia hodi ezerse kontrolu polítiku ne’ebé efetivu kona-ba atuasaun Autoridade Marítima Nasionál.
Antes ne’e, Governu liuhosi desizaun Konsellu Ministru aprova ona projetu Dekretu-Lei ne’ebé aprezenta hosi Ministru Defeza SAM, ne’ebé sistema ne’e hakarak afirma soberania nasionál no projeta Estadu nia autoridade iha tasi ne’ebé sujeita ba jurizdisaun Timór nian.
Iha fatin hanesan, bele estabelese ona iha ‘Estudu Forsa 2020’ iha Planu Estratéjiku Dezenvolvimentu Nasionál (PEDN) 2011-2030 no mós iha Konseitu Estratéjiku ba Defeza no Seguransa Nasionál ne’ebé daudaun ne’e vigora hela.
Governu aprova kriasaun SAM nu’udar kuadru institusionál atu halo koordenasaun ho entidade sira hanesan órgaun ka servisu sira iha nível sentrál no perifériku ne’ebé ho funsaun halo koordenasaun ho ezekutivu, konsultivu ka polisiál, hodi ezerse podér autoridade Estadu kona-ba espasu marítimu ne’ebé sujeita ba soberania no jurizdisaun nasionál.
Ho dekretu-lei ne’e sei kria mós Autoridade Marítima Nasionál (AMN) no Xefe Estadu Maiór Jenerál hosi Forsa Armada maka sei kaer rasik knaar ne’e.
Nune’e mós, sei kria mós Diresaun Autoridade Marítima no ninia serbisu sira ne’ebé ho kompeténsia iha ámbitu SAM.
Jornalista : Antónia Gusmão
Editora : Julia Chatarina
