DILI, 02 dezembru 2021 (TATOLI)–Ministru Agrikultura no Peska (MAP), Pedro Reis, relata, daudaun ne’e iha eskola tékniku vokasionál agrikultura haat mak eziste iha Fuiloro, Mouleana, Natarbora no Oé-cussi, maibé rua entrega ona ba autoridade atu kontrola.
“Governu deside entrega eskola ida iha Fuiloro ba Misaun no ida iha Oé-cussi ba Rejiaun Administrativa Espesiál Oé-cusse Ambeno (RAEOA) atubele ajuda halo kontrolu direta. Ita hasoru problema barak kona-ba infraestrutura, edifísiu eskola sira dezde tempu okupasaun Indonézia to’o ohin loron nunka hetan atensaun hosi Governu,” Ministru Pedro hateten iha Parlamentu Nasionál (PN), kinta ne’e.
Tuir Ministru, eskola sira nunka hetan atensaun tanba laiha osan sufisiente, tanba ne’e to’o agora kondisaun eskola haat ne’e ninia edifísiu estraga hotu.
“MAP rasik durante ne’e hasoru problema barak kona-ba infraestrutura, liuliu edifisu ne’ebé mak uza hodi estabelese eskola tékniku vokasionál agrikultura ne’e mai hosi okupasaun Indonézia nia, ne’ebé tinan-40 resin ona,” nia akresenta.
Tanba ne’e, bainhira MAP hasoru malu ho Komisaun G, ne’ebé trata asuntu Edukasaun, Kultura, Juventude, Desportu no Sidadania, propoin ona atu ajuda tau orsamentu hadi’a eskola haat.
“Ami prevee duni osan ba eskola haat ne’e maibé la sufisiente, Tanba ne’e ami husu Komisaun G nia apoiu atu tau mós osan ba eskola haat ne’e iha tinan 2022 atubele halo planu konstrusaun,” nia dehan.
Jornalista : Tomé Amado
Editora : Julia Chatarina
